Бөлүмдөр
Бейшемби, 19-сентябрь
Талас облусуБакай-Ата району 02.09.2019 09:44

Айыл турмушу: Бакай-аталык В.Шүкүрбекова 20 жылдан бери чеберчиликти аркалап келе жатат (сүрөт)

Turmush -  Бакай-Ата районунун Өзгөрүш айылынын 42 жаштагы тургуну Венера Шүкүрбекова 20 жылдан бери кол өнөрчүлүк менен алектенип келе жатат. Аймактык кабарчы аны менен таанышты.

Өзүнүн айтымында, Кара-Буура районуна караштуу Бейшеке айылында төрөлгөн. 1995-жылы Бактыбек Бөкөев менен баш кошуп, Өзгөрүш айылына келин болуп келген.

«Жолдошум 4 уулдун кичүүсү. Үйүндө кыз жок болгондуктан кайын атам менен кайын энем мага кызындай мамиле жасашчу. Кайын энем мончогунан бери берип, насаатын айтып отурчу. Эч нерседен кем кылган жок.

Жолдошум 1-класс курагында балдар менен жаа атып ойноп жүргөндө дос баласы кокустан көзүнө атып алып, майып болуп калган экен. Майыпсың деген жокмун. Азыр кудайга шүгүр, дыйканчылык менен алектенет. Баягы досу менен азыркыга чейин катташат.

Өзүм 7 бир туугандын үчүнчүсүмүн. Мага көп бир тууган болгон жагат. Келиндерге «көп балалуу болгула, алар өз ырыскысы менен келет» деп айтам.

7 баланын ата-энеси болуп, эл катары жашап келебиз. Бирок жетөөнүн бири чарчап калган. Быйыл 11-класс болмок. Кайтыш боло турган адам өзгөчө болот дегендей, Алия кызым 5 айында басып, бир нерселерди чулдурап ырдап калган. Мендей болуп ушул кызым ырга жакын деп калчумун. Балдарым меймандос жана боорукер. Улуу балам «Алиянын ордун жоктотпой дагы бала болсо» деп көп айтат. Улуу балам дагы көп бир тууган болууну каалайм деп калат (күлүп). Чындыгында ар бир балам төрөлгөндө муктаждыктарыбыз өзүнөн-өзү чечилип жатты. Албетте кичинекейинде ызы-чуу болуп, урушуп-талашып чоңоюшат. Бирок эрезеге жеткенде таянар жакындары көп болот.

Мен мектеп интернатында окудум. Жакшы окуп бүтүргөм. Ыр-бий жашоомдун бөлүгү болчу. Мектеп курагымдан ырдап, бийлеп, сынактарды жеңип, Казакстанга, Москвага бир нече ирет бардым. «Бүчүр» деген бий ансамблдин курамында дагы болдум. Азыр дагы үн созуп калмайым бар (күлүп). Мектеп интернатынан үйрөнгөн тигүүчүлүк өнөрүм менен жайы-кышы дебей кийим тигем. Түрлөп токуу менен эмгек кылганыма 20 жылдын тегереги болуп калды. Ким кандай деп айтса ошого жараша токуп, кооздоп берем. Балдарымдын баарына кийимдерди кээде гана сатып албасам, көпчүлүк учурда өзүм тигип берем. Эл «эмгектериң кудум фабрикадан чыккандай» деп калышат. Узун жана илмек ийнелер менен чоң өлчөмдөгү кийимдерге чейин токуйм. Кийим же буюмдун токулушу канчалык татаал болсо ошончолук ырахат алып токуйм. Эми кыздарыма үйрөтүп жатам. Балдарыма кийим токуп же тигип бергенде ыраазычылыгын айтып турушат. Мен ошондой жакшы сөздү угуп, көңүлүм көтөрүлүп, дагы токуп бергим келет», - деди ал.

Венера айымдын уул-кыздары:

- Акматова Айгерим 1997-жылы төрөлгөн;

- Акматов Сыймык 2000-жылы төрөлгөн;

- Акматова Алия 2002-жылы (чарчап калган);

- Акматов Адилет 2008-жылы төрөлгөн;

- Акматова Аяна 2011-жылы төрөлгөн;

- Акматова Айтунук 2015-жылы төрөлгөн;

- Акматов Алинур 2017-жылы төрөлгөн.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×