Бөлүмдөр
Бейшемби, 19-сентябрь
Талас облусуКара-Буура району 29.08.2019 15:01

Айыл турмушу: Анаркүл апаны кайын энеси 9 кыздын ордуна келин кылып алган (сүрөт)

Turmush -  Кара-Буура районунун Шекер айылынын 64 жаштагы тургуну Анаркүл Жумабаева балдары менен жолдошунан калган алма бакты өстүрүп келет. Аймактык кабарчы ападан кабар алды.

Өзүнүн айтымында, Таластын Көк-Дөбө айылында төрөлгөн. Шекер айылына 1975-жылы келин болуп келген.

«Жолдошум менен илгери мен саанчы болуп жүргөндө таанышып, бири-бирибизди жактырып баш кошконбуз. Мен ал учурда саанга Шекерге келчүмүн. Кайын энем дагы саанчы болчу. Жолдошум апасына жардам берчү.

Өзүм мектепти 1973-жылы бүттүм. Ага чейин жолдошум аскерде болду. Мен окууну бүткөндө Бишкектеги техникумда окуп келдим. Аскерде жүргөн 2 жыл ичинде кат алышып турдук. Андан кийин жолдошум аскерден келип, мени Шекерге колдон алып келди. Эң кызыгы, жаңы келгенде кайын атам менен кайын энем эшиктен кире электе мен унаадан жерге түшүп кетиптирмин. Жанымдагы курбу кызым «коё тур, сен келин болуп келдиң да» деп токтотуп, кайра унаага отуруп калгам (күлүп). Жолдошум экөөбүз бири-бирибизге бөлө болобуз. Баш кошуубузга туугандар каршы болгон эмес. Биздин учурда калың көп берилчү. Кудалардын астына жыгылып барчу. Ачуу басар деген болчу. Мен үчүн 1 жылкы алып барышкан. Калыңга болсо 3 тай, 1 кулундуу бээ, 4 уй, баары биригип 9 баш мал алып барышкан. Үйдөн кайын энем «мен сени кыздын ордуна алгам» деп мени урушуп койчу (күлүп)», - деди ал.

Жолдошу 8 жыл мурда көз жумган.

«Ыраматылык жолдошум Кубанычбек Жумабаев Шекер айылында төрөлгөн. Экөөбүздүн жашыбыз тең болчу. 5 балалуу болдук. Учурда 2 келиним бар. Улуу балам Замирбектин жубайы Гүлмираны өзүм жактан алганбыз. Эң биринчи келин алганда толкундоо сезимдер болот экен. Экинчи келин алганда тажрыйба алып калат экенсиң (күлүп). Биринчи келиним келгенде үйдө даяр эмес болчубуз. Келинге кайын эне көйнөк алып коёт эмеспи. Келиниме көйнөк жок, өзүмдүн көйнөгүмдү кийгизип койгонум эсимде. Андан кийинки келинимди Кара-Буура районуна караштуу Жөн-Төбө айылынан алгам. Келинимдин аты Зарида, баламдын аты Сыргабек. Келиндеримди дагы той менен, калыңы менен алдык. Кайын эненин кадырын кайын эне болгондо билет экенсиң. Азыр келиндерим менен очор-бачар болуп жашап жатабыз. Баары тарбиялуу.

Мурда биздин учурда казанга нан жапчубуз. Электр тогу өчүп калса дагы жумушубуз токтоп калчу эмес. Азыркы заманда баары бар, телегейи тегиз. Ток өчүп калса казанга нан бышыргысы келбейт, азыркылардын (күлүп). Азыркы менен мурдагы учурдун айырмачылыгы ушулар окшойт. Илгери бизде газ бар болчу. Бирок газга нан жапканды билчү эмеспиз. Кийин эле акылдуу болуп, газга нан бышырып калдык.

Союздун убагында жолдошум колхоздо мал багып иштеди. Мен МТФте иштедим. Союз таркагандан кийин лесхоздун жерин иштетип, алма бак тиктик. Жолдошум экөөбүз тиккен алма бак эми түшүм берип баштады. Колхоздон сарай сатып алганбыз. Сарайдын жанында 2 гектар алма багыбыз бар. Ал жыл сайын керегибизге жарап, түшүм берип турат. Балдарды ошол менен багып жатабыз. Учурда балдарымдын жанында, неберелердин сый-урматына бөлөнүп жашап жатам», - деди ал.

Анаркүл айым 3 уул, 2 кызынан 17 небере, 1 чөбөрөлүү болду.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×