Бөлүмдөр
Бейшемби, 19-сентябрь
Ош облусуАраван району 28.08.2019 11:14 На русском

Айыл турмушу: Анжир өстүргөн Н.Дадажанов мөмөнүн 1 даанасын канча сомдон сатууда? Видео

Turmush -  Араван районунун Нур-Абад айыл өкмөтүнүн тургуну Нуридин Дадажанов 4 жылдан бери анжир өстүрөт. Ал отургузган анжир дарактары быйыл гана түшүм бере баштады. Нуридин мырза менен аймактык кабарчы маектешти.

Анжир дааналап сатылат. Багбандын айтымында, анын түшүмүн Бишкек шаарына чейин сатканга алып кетишет.

«Жалпы 54 сотых жерим бар. Анын 20 сотых жерине 180 түп анжир дарагын отургузгам. Дарактарды отургузганыма 4 жылдын жүзү болду. Дарактар 4 жылда гана түшүм бере башташат экен. Анжирдин 1 даанасын базарда 1,5-2 сомдон сатып жатабыз», - деди Н.Дадажанов.

Ал анжир дарактары көп суу талап кыларын айтты.

«Дарактарды канчалык көп сугарсаң, ошончолук көп мөмө байлайт. Алар ысыкты сүйүшөт. Жайында көбүрөөк сугарбасаң, жалбырактары куурап калышы мүмкүн. Ошондой эле кеч күздө дарактардын ар бирин кездеме менен ороп чыгабыз. Антпесе кыш мезгилинде аларды үшүк алып кетиши мүмкүн», - дейт багбан.

Анын айтымында, анжир өстүрүүдө органикалык жер семиркичтерди (малдын кыгын) көп колдонуш керек.

«Эл эмгегин жер жебейт» деп айтылат эмеспи. Биз тынымсыз эмгек кылабыз. Ошондуктан түшүм мол болуп, мээнетибизди актайт. Анжир дарактары быйыл биринчи жолу мөмө байлап жаткандыктан, түшүмү бир аз азыраак. Дарактардын түбүнө химиялык азот семирткичтерин да анча-мынча салып турабыз. Органикалык таза жер семирткичтерди табуу оңой эмес. Алыскы айылдарга барып, малдардын кыгын жүктөп келебиз», - деди Нуридин мырза.

Ал былтыр Араван районунда анжирдин 1 даанасы 5 сомдон сатылганын кошумчалады.

«Былтыр кошуналарым анжирди 5 сомдон сатышкан. Быйыл эмнегедир баасы арзан. Күнүнө 200-250 даана анжир сатабыз. Көбүнчө Араван районунун борбордук базарына алып чыгабыз. Туруктуу кардарларым да бар. Бир кардарым келип, 400-500 даана быша элек анжирлерди сатып алып, Бишкекке алып кетет. "Эмне үчүн быша электе алып кетесиң?" деп сурасам, унаанын артына жүктөп, үстүн жаап коет экен. Анжирлер ысыкта бууланып, Бишкекке жеткиче бышып калат экен», - деди Н.Дадажанов.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×