Бөлүмдөр
Жекшемби, 15-сентябрь
Чүй облусуСокулук району 27.08.2019 14:40 На русском

Самбо менен эркин күрөштөн ийгилик жарата албаган Эркинбек башка спорттон олжолуу болууда

Turmush -  Чүй облусунун Сокулук районуна караштуу Жаңы-Пахта айылынын тургуну Исраилов Эркинбек Темирович буга чейин самбо жана эркин күрөш боюнча машыккан. Бирок ийгиликтерди жарата алган эмес. Учурда ал спорттун башка түрү менен алектенип жатат.

«Спортко 8-класста келгем. Алгач согуштук самбо боюнча машыкчумун. Бирок ийгилик жарата алган жокмун. 10-класста эркин күрөшкө катышып баштадым. Ал эми эрежесиз эр урушка ушул жылы гана келдим. Ушул спорттон ийгиликтерди жарата алдым жана мага жакты. Азыркы убакта WEF Amateur Fight'тун 5 жолку чемпионумун, MMA Pankration'дун 1 жолку чемпиону болууга жетиштим. Бирок ата-эне деген ата-эне экен. Дайыма балдарын ойлойт. Мени мелдештерге чыгарбай жатышкан. Бирок аларды эптеп көндүрүп жатып беттештерге чыктым. Ал беттештерден жеңип келгенден кийин ата-энем макул боло башташты», - деди жаш спортчу.

Ал өзүнөн чоң салмактагы спортчу менен беттешке чыкканын унута албайт.

«Бизде көп эле кызыктуу окуя болот. Анын ичинен эсимден кетпеген мелдештерди айтып берейин. 2019-жылы 23-февралда өткөн WEF AMATEURS EURASIA мелдештин финалында каршылашымдын салмагы оор болчу. Мен 61 кг салмак менен чыксам, ал 72 кг салмак менен чыгыптыр. Салмагы оор болгондуктан 3:2 эсеби менен жеңилип калдым. Бирок калыстар каршылашымдын салмагы оор экенин байкап калып, аны таразага түшүрүп, жеңишти мага берип коюшкан. Мен ушул жерден уюштуруучулар менен калыстарга ыраазы болдум. Калыс чечим чыгарышты. Болбосо спортчулар эрежени буза беришмек», - деди ал.

Исраилов Эркинбек Темирович Сокулук районунун Жаңы-Пахта айылында 2001-жылы төрөлгөн.

«Атам Исраилов Темир Вохобович, апам Исраилова Айзада Зайниева. 6 бир туугандын бешинчисимин. Бизди чоңойтуп, ушул даражага жеткирген ата-энебизге чексиз ыраазыбыз. Негизи биз үй-бүлөбүз менен спортко жакынбыз. Агам Исраилов Таалай Темирович азыркы убакта армрестлинг боюнча Кыргызстандын 2 жолку чемпиону. Өзүм 2019-жылы Сокулук районунун Жаңы-Пахта орто мектебинин бүтүрүүчүсү болдум. Ж.Баласагын атындагы Кыргыз улуттук университетинде билим алууну улантам.

Бош убактым болуп калса теннис жана футбол ойнойм. Келечекте чоң мелдештерге чыгайын деген максаттар бар. Кыргыз элин башка өлкөлөргө таанытып, желегибизди желбиретсем деген аруу тилегим бар. Учурдан колдонуп, ата-энеме, бир туугандарыма, машыктыруучум Бабыр Жиенбаевге ыраазычылык билдирем. Менин ийгилигиме ушул адамдардын салымы чоң», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×