Бөлүмдөр
Бейшемби, 19-сентябрь
Талас облусуБакай-Ата району 26.08.2019 14:59

Айыл турмушу: Бакай-аталык К.Ниязбеков ата өнөрүн улап, устачылыкты аркалап келе жатат (сүрөт)

Turmush -  Бакай-Ата районунун Өзгөрүш айылынын 51 жаштагы тургуну Кутман Ниязбеков ата өнөрүн улап, устачылыкты аркалап келе жатат. Аймактык кабарчы аны менен таанышты.

Өзүнүн айтымында, устачылыкты аркалаганына 20 жылдын жүзү болду.

«Жүрөгүмө жакын устачылыгым педагогикалык кесибимди таштоого мажбурлаган. 1992-жылы Ош мамлекеттик университетинин музыка боюнча педагогикалык факультетин аяктагам. Ал убакта кайсы жерде жаш мугалимдер жетишпесе ошол жакка жөнөтүшчү. Мен алгачкы эмгек жолумду Талас районунун Жоон-Арык айылындагы орто мектепте музыкадан сабак берип баштагам. Кийин өзүм билим алган мектепте 13 жыл музыка сабагынан мугалим болдум. Музыканы сүйөм, бирок мугалим болуу үчүн көөдөнүңдө мугалимдик шык болушу керек экен. Мугалимдик кесибимди таштап, ырахат алып, жан дүйнөм менен берилип иштей турган устачылык менен алек болуп келе жатам. Негизи чоң аталарыбыз музыкант, уста болгон өнөрлүү адамдар.

Буюм-тайымдарды жасаш үчүн станоктор керек. Алардын бардык түрүн чогултуп алдым. Кайыш дагы тигем. Чоң атам экөөбүз кол менен көптөгөн буюмдарды тикчүбүз. Чоң атам «колдон чыккан эмгек бекем болот» дечү. Анын буюмдары азыркы күнгө чейин бар, бекитип отурам (күлүп). Буйруса үйгө чакан музей жасап, ошондо сактап коёюн деп чогултуп жүрөм. Муундан-муунга өтсө дейм. Азыр чоң атамдай болуп кайыштан буюм жасап, аны колго тиккен дээрлик эч ким жок. Мурун айылдагылар чоң атамдын тиккенин көрүп, «машинеге тиктиң» деп ишенишчү эмес.

Бүгүнкү күндө тиричиликке пайдаланган буюмдардын бардыгына буйрутмалар келет. Куран китебин койгон столдон баштап ээрге чейин жасатып кетишет. Такта, үбөлүктөр 700 сомдон сатылат. Тактайларын атайын Бишкектен алып келем. Мындай такталар Талас ичинде жок. Кымбат такта деп баары ала беришпейт. Бирок андан жасалган буюмдарга талап чоң. Метрин 1200 сомдон баалап, конок столдорун дагы түрлөп жасайм. Аттын жүгөндөрү 2800 сомдон бааланат. Себеби поляктардын вариантында тигилип, темирлерин дат баспайт. Аны кеминде 20 жыл колдонот. Ал эми жөнөкөй жүгөндөр 400 сомдон болот. Буйрутмалар Кара Балтадан бери келет.

Чоң атам бир топтом ат жабдык жасап, Аксыдагы эжебизге белекке берген. Кийин ал каралбай, ар ким талап кетиптир. 1 гана ээри калган экен. Аны укканда өзүм барып, ээрди алып келдим. 1960-жылдарга таандык буюмдарды ошол ээр менен бирге сактап жүрөм. Ээрди сурап келгендер бар. «Канча деп айтсаң ошону беребиз» дегендер болгон. Канча сом берсе дагы сатпайм. Анткени бул тарыхый сувенир болуп калат.

Андан тышкары таза кандуу англис тукумундагы күлүктөрдү багам. Байкөл деген күлүгүм Таластын чемпиону болуп, убагында көптөгөн байгелерге ээ болгон», - деди ал.

Уста 2 уул, 1 кыздын атасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×