Бөлүмдөр
Шаршемби, 18-сентябрь
Ош облусу, Ош 22.08.2019 18:27

Нааразы болгон өзбекстандык мушкердин атаандашы А.Арыкбаев реваншка даяр: Чыр эмнеден чыккан? Видео

Нурсултон Рузибоев жана Алтынбек Арыкбаев
Нурсултон Рузибоев жана Алтынбек Арыкбаев

Turmush -  20-август күнү өзбекстандык мушкер Нурсултон Рузибоев Кара-Суу шаарындагы «Манас» стадионунда өткөн турнирге нааразы болуп, өзүнүн инстаграм баракчасы аркылуу видео кайрылуу жасаган. 21-август күнү Ош облустук ички иштер башкармалыгы 27 жаштагы Нурсултон Рузибоевдин видео кайрылуусу боюнча сотко чейинки өндүрүш иштерин баштаган.

Ош ОИИБдин басма сөз кызматынын маалыматына караганда, спортчу улуттук же региондор ортосундагы кастыкты козутууга, улуттук ар-намысты кемсинтүүгө багытталган видео кайрылуу жасаган. Бул окуя Кылмыштардын жана жоруктардын бирдиктүү реестрине Кыргыз Республикасынын Жазык кодексинин 313-беренесинин негизинде (Расалык, этностук, улуттук, диний же региондор ортосундагы кастыкты козутуу) катталган.

Андан кийин Нурсултон Рузибоев өзүнүн инстаграмдагы баракчасы аркылуу экинчи жолу видео кайрылуу жасаган. Спортчу ал кайрылуусунда Кыргызстандын элине эмес, Кара-Суу районунун тургундарына жана мелдештин катышуучуларына нааразы экенин билдирген.

«Биринчиден, судья биздин желекти ыргытып, сөгүнүп, түртүп баштады. Ал биздин желекти ыргытууга, сөгүнүүгө кандай акысы бар? Топ адамдар мага кол салууну көздөдү. Эмне үчүн алар конокторго мындай мамиле жасашты? Менин кайрылуум Кара-Суунун жашоочуларына, ошол беттештерге катышкандарга багытталган. Мен жаздырган видеону өздөрүнүн кызыкчылыгы үчүн кыркып коюшуптур. Мен Кара-Суудагы турнир жөнүндө айтып жаткам, ал эми видеону мен Кыргызстан жөнүндө айып жаткандай көрсөтүп жатышат», - деген Нурсултон Рузибоев.

Буга чейин Turmush басылмасы 18-августта Кара-Суу шаарында эрежесиз эр уруш боюнча эл аралык «WEF85 PROFFIGHT36» турнири өткөнүн жазган. Мелдешти дүйнөлүк «Кулатуу Эртаймаш» федерациясы уюштурган. Анын алкагында 84 кг салмакта кыргызстандык Алтынбек Арыкбаев өзбекстандык Нурсултон Рузибоев менен мушташып, ишенимдүү түрдө жеңишке жетишип, чемпиондук курун сактап калган.

Аталган турнирге барып, беттештерди жеринен көргөн Бекназар Абылкасымов өзбекстандык мушкер 1-раунддун убактысы бүткөнүн түшүнбөй, атаандашын жеңдим деп жаңылыш ойлоп алганын билдирди.

«Кыргызстандык мушкер Алтынбек Арыкбаев менен өзбекстандык мушкер Нурсултон Рузибоев бири-биринин бутун кайрып жатышкан. Калыс мушкерлерге беттештин биринчи бөлүгү бүткөнүн билдиргенден кийин, А.Арыкбаев өзбекстандык мушкерге убакыт бүттү деп анын желкесинен таптаган, бирок өзбек мушкери атаандашын жеңилди деп ойлоп, Өзбекстандын желегин көтөрүп, жеңдим деген ой менен октагондун ичинде чуркап баштады. Калыс анын түшүнбөй калганын айтканда, мушкер калыс менен сөз талаша кетти. Калыс өзбекстандык мушкердин желегин сыртка ыргытып жиберип, ага нааразы болгон Нурсултон Рузибоев беттешти токтотуп, кетип калды. Н.Рузибоевдин бул кылыгына турнирге келген эл ачууланып, анын жолун тороп туруп калышты. Бирок милиция кызматкерлери мушкерди эч кимди тийгизбей алып кетишти», - деди Кара-Суу районунун тургуну Бекназар Абылкасымов.

Ал эми кыргызстандык мушкер Алтынбек Арыкбаев мүмкүнчүлүк болсо Н.Рузибоев менен кайрадан беттеш өткөрүү ниети бар экенин билдирди. Ал Н.Рузибоевди провокациялык видеолорду таратпоого чакырган.

«Ал жерде баары туура болду. Калыстардын чечими чыга электе эле Нурсултон октагондон чыгып кетти. Анын бул кадамы бир аз туура эмес болуп калды. Ар кандай видеолорду таратып жатыптыр. Бул да туура эмес. Кыргыз-өзбек эли — бир тууган. Мен элди провокацияга алдырбоого чакырам. Беттеш кайрадан уюштурулса, мушташууга макулмун. Беттеш же Өзбекстанда же Кыргызстанда болсун, даярмын», - деди А.Арыкбаев.

А.Арыкбаевдин машыктыруучусу Таалайбек Асиев дагы спорт сүйүүчүлөрүн улут аралык маселелерди козутуудан алыс болууга чакырды.

«Негизи мушкер калыстардын чечими чыкканга чейин октагондон чыкпай турушу керек болчу. Н.Рузибоев болсо калыска нааразы болуп сыртка чыгып, федерациянын президенти Руслан Кыдырмышевдин жанына барып, ашыкча кадамдарды жасап жиберди. Ал — профессионал мушкер, мындай кадамдарды жасаганы туура эмес болуп калды. Эки эл эзелтеден бери бир тууган, дос. Андыктан улут аралык, региондор аралык маселелерди козутуудан алыс болууга чакырам», - деди Т.Асиев.

Дүйнөлүк «Кулатуу жана Эртаймаш» федерациясынын Кара-Суу шаарындагы өкүлү Жаныбек Полотов беттештер мыйзамдуу өткөнүн белгиледи.

«Биз уюштуруучулардын атынан ыңгайсыздыктар үчүн кечирим сурайбыз. Мындан ары беттештердин толук видеосун жарыялап турабыз. Спорт сүйүүчүлөрдү провокацияга алдырбоого, сабырдуу болууга чакырам. Ошондой эле коомдук коопсуздукту көзөмөлдөп берген милиция кызматкерлерине ыраазычылык билдиребиз. Анткени алар таң аткандан кечке чейин коопсуздукту камсыздап турушту», - деди Ж.Полотов.

Кара-Суу районунун дене тарбия жана спорт комитетинин төрагасы Заирбек Эшмаматов да турнир мыйзамдуу өткөнүн тастыктады.

«Дүйнөлүк "Кулатуу жана Эртаймаш" федерациясы бизге кат менен кайрылган. Биз алар менен бирге аталган мелдешти уюштурганбыз. Турнир жогорку деңгээлде уюштурулуп, миңдеген спорт сүйүүчүлөр келди», - деди ал.

Маалыматка караганда, турнирге Кыргызстандан, Тажикстандан, Өзбекстандан жалпы 50дөн ашык мушкер катышкан жана 26 беттеш өткөрүлгөн. Алардын ичинен 3 беттеш чемпиондук кур үчүн болчу.

Болжол менен мелдешке 5 миңге жакын күйөрман күбө болду.

Turmush басылмасы өзбекстандык мушкер Нурсултон Рузибоев жөнүндө жазган. Толук маалымат бул шилтемеде.

Ошондой эле Turmush басылмасы өзбекстандык спортчу өз мекенинде жүргөндүктөн, тергөө иштери эл аралык Минск конвенциясына ылайык жүргүзүлөрүн жазган. Толук маалымат бул шилтемеде.
Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×