Бөлүмдөр
Шаршемби, 21-август
Жалал-Абад облусу, Токтогул 28.07.2019 16:45 На русском

Үрөй учурган жол кырсык: Бүгүн «Степвагон» бир жүргүнчү менен чогуу өрттөнүп кетти. Видео

Turmush -  Токтогулда өзбекстандык айылдаштар бара жаткан «Степвагон» унаасы жол кырсыкка кабылып, анын кесепетинен бир жүргүнчү унаа менен чогуу күйүп кетти. Башка жүргүнчүлөр ооруканага жеткирилген.

Окуя бүгүн, 28-июлда эртең менен саат 08:00 чамасында Ош—Бишкек жолунун 319-400-чакырымында «Тойота Камри» менен «Степвагон» унаасынын катышуусунда болгон. Унаалар сүзүшүп, анын кесепетинен 7 орундуу унаадан өрт чыккан. Андагы 6 жүргүнчү Токтогул районундагы Үч-Терек аймактык ооруканасына жеткирилди. Бул маалыматты Жалал-Абад ОИИБдин ЖКККБнын ага инспектору Айбек Сатыбалдиев да тастыктады.

Ош облусунун Кара-Суу шаарынын тургуну Д.И. «Тойота Камри» унаасы менен Оштон Бишкекти көздөй бара жатканда каршы жолго чыккан. Андан соң «Степвагон» үлгүсүндөгү унааны сол капталынан сүзгөн.

«Бул кырсыктан улам 7 орундуу унаанын ичиндеги жүктөр, документтер жана бир адам толугу менен күйүп кеткен. Каза болгон адамдын аты-жөнү такталып жатат. Калган 5 жүргүнчү денесинен түрдүү жараат алып, Үч-Терек аймактык ооруканасына жаткырылса, айдоочусу Токтогул райондук аймактык ооруканасынын хирургия бөлүмүнө жеткирилди», - деди А.Сатыбалдиев.

Жүргүнчүлөрдүн баары коңшу Өзбекстан Республикасынын Фергана облусунун тургундары экени аныкталган.

Алар:

1. Х.И., 1989-жылы туулган;

2. С.А., 1991-жылы туулган;

3. Ж.Р., 1986-жылы туулган;

4. С.Ж., 1998-жылы туулган;

5. А.Х., 1990-жылы туулган;

6. Ш.Р., 1986-жылы туулган.

Ал эми «Тойота Камри» унаасынын айдоочусуна биринчи медициналык жардам көрсөтүлдү. Андагы үч жүргүнчү жеңил жаракат алып, окуя болгон жерден кетип калышкан.

ӨКМдин Жалал-Абад облусундагы башкармалыгынын маалыматына караганда, 28-июлда саат 07:45 чамасында куткаруучуларга Бишкек-Ош жолунун 317-чакырымындагы Күнтийбес тилкесинде автоунаа күйүп жатат деген маалымат келип түшкөн. Өрт өчүрүүгө Токтогул райондук өрт-куткаруу бөлүмүнүн №60 өрткө каршы-куткаруу бөлүгүнүн 1 өрт өчүрүүчү автоунаасы тартылган. Өрт саат 08:16да толугу менен өчүрүлүп бүткөн. Өрт өчүрүү убагында автоунаанын ичинен 1 күйгөн адамдын денеси табылып, тиешелүү органдарга өткөрүлүп берилген.

«Тактоо иштеринин жүрүшүндө “Хонда Степвагон” автоунаасы “Тайота Камри” менен кагышкандан улам күйүп кеткендиги аныкталган. “Хонда Степвагон” автоунаасынын айдоочусу - 1989-жылы туулган Ч.Ж. Ош облусунун Өзгөн районунун тургуну болгон. Автоунаанын ичинде 8 адам болгон. Кырсыктын кесепетинен “Хонда Степвагон” автоунаасынын 1 жүргүнчүсү каза болгон. Анын өздүгү тактала элек (Өзбекстандын жараны болушу мүмкүн). Ал эми, “Тойота Камри” автоунаасынын айдоочусу – 1981-жылы туулган Д.И. Ош облусунун Кара-Суу районунун тургуну болгон. Ал автоунаанын ичинде 4 адам болгон.

Кырсыктан 6 жаран түрдүү жаракаттарды алып, анын ичинен тертөө Үч-Терек аймактык ооруканасына, экөө Токтогул райондук аймактык ооруканасына жеткирилген», - деп айтылат маалыматта.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×