Бөлүмдөр
Шаршемби, 23-октябрь
Баткен облусуЛейлек району 15.07.2019 16:50 Жаңыланды: 02.09.2019 10:23 На русском

Айыл турмушу: Лейлектик Б.Теңирбаев 7-8 жолу кыйса да өсө берген павловния дарагын өстүрүүдө (сүрөт)

Turmush -  Лейлек районунун 50 жаштагы тургуну Ботобек Теңирбаев өзүнүн кесибин жеңилдетүү, сапаттуу эмеректерди, курулуштарды жасоо максатында павловния дарагын өстүрүп жатат. Аймактык кабарчы аны менен таанышты.

Анын айтымында, бүгүнкү күндө эң алгач эккен көчөттөрдүн бийиктиги 1 метрден ашты.

«Мындан 2 жыл мурун павловния дарагын интернеттен көрүп калдым. Сүрөтү аркылуу элден сураштыра баштадым. Алгач мага арча деп маалымат келген. Интернеттен арчанын бүт түрүн карап, бирок таппай койдум.

Бир күнү сыналгы көрүп үйдө отурсам павловния дарагы тууралуу маалымат көрсөтүп калды. Маалыматты көргөн соң кызыгуум ого бетер артып, интернеттен өстүрүү шарттарын бүт изилдеп чыктым. Акыры 2014-жыл павловния дарагын Кыргызстанга алгачкылардан болуп алып келген Эрмек Кубатаев менен жолугуп, анын семинарларына бир топ жолу катыштым. Быйылкы жылдан баштап өзүм өстүрүп баштадым.

Негизги бул дарактын 20га жакын түрү болот экен. Кээ бири кооздук үчүн, кээ бири жыгач катары колдонуу үчүн өстүрүлөт. Өзүм уста болгондуктан жыгач катары колдонуу үчүн өстүрүп баштадым.

Алгач уругун чакан күнөсканада жетилтип, көчөттү отургузууга жарай турган мезгилге чейин үй шартында чоңойттум. Бүгүнкү күндө эң алгач эккен көчөттөрүмдүн бийиктиги 1 метрден ашты.

Башка дарактардан отургузуу мезгили да өзгөчө экен. Апрель айынын аягынан август айына чейин күн жылуу мезгилде отургузулат. Тиккенден соң 2 жыл жакшы карап, сууну убагында жеткирип, жетилтип койсоң андан ары өзү өсүп кетүүгө мүмкүнчүлүк болот. Анткени павловния дарагынын тамыры жер кыртышында 9-10 метрге чейин тереңдеп, керектүү азыктарды, сууну алат. Өзгөчөлүгү өтө көп. Кыргызстандын шартында жылына 3 метр бийиктикке чейин өсүп, 4-5 жылда курулушка жарап калат. 7-8 жыл өскөн 1 павловния 1 куб жыгач берүүгө жөндөмдүү. Андан сырткары бир отургузулган көчөтү жетилген соң 7-8 жолу кыйсаң да кайра жетилип, курулуш материалын бере алат. Жыгачын дагы курт-кумурска жебейт. Бүгүнкү күндө айыл өкмөттөн 5 гектар жерди ижарага алдым. Ага павловния дарагын отургузууну пландап жатам», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×