Бөлүмдөр
Шаршемби, 24-июль
Талас облусуТалас району 11.07.2019 11:39

Жаш талант: 18 жаштагы Б.Бакасов күндө кошуна айылга каттап, волейбол боюнча машыгууда (сүрөт)

Turmush -  Талас районунун Үч-Эмчек айылынын 18 жаштагы тургуну Бекзат Бакасов волейбол боюнча ийгиликтерди жаратып келет. Аймактык кабарчы аны менен таанышты.

«6-классымдан тарта волейбол ойногонго кызыкчумун. Дене тарбия сабагын окуткан агай чоң атам болчу. Аны ээрчип алып оюндарга барчубуз. Ал ойнойт, мен түн киргенге чейин оюн көрүп отурам. Өзүм аралашып ойнобосом дагы аларды карап отурган жакчу. 8-класска чейин мектеп ичинде ойноп келсем, 8-класстан кийин райондук, облустук мелдештерге аралаша баштадым.

Эртең оюн болот деген күнү үйгө эрте келип, болгон жумуштун баарын аткарчумун. Анткени оюн көпкө созулуп калчу. Ошол үчүн өзүмө тиешелүү жумуштарды бүтүрүп кетчүмүн. Мектептер арасында спорттук мелдештер кыш мезгилинде өткөндүгүнө байланыштуу бир жолу үйдө ооруп жаткам. Ал учурда сабакка дагы барбай, үйдө дарыландым. Ошол күнү мектептен агай телефон чалып, «волейбол боюнча мелдешке барабыз, келе аласыңбы?» деп калды. Агайга жок деп айта албастан эле мектепке жөнөдүм. Оюнга катышып келдим, биздин мектеп 1-орунду алды. Бирок эртеси күнү менин оорум күчөп, кайра үйдө жатып калдым. Кийин мектепке барсам класс жетекчим «топко келесиң да сабакка катышпайсың» деп урушкан (күлүп).

Жакын арада волейбол боюнча республикалык мелдеште Талас облусунун атынан катышып, 2-орунду алып келдик. Бул мен үчүн чоң жетишкендик болду. Анткени өзүмдүн кичи мекенимдин намысын коргоп, «мыкты оюн көргөзүп келди» деген сөз мен үчүн чоң сыймык.

Биздин кошуна айылга жаңы спорт зал курулган. Ал жерде ойногондор көп болгондуктан күнүгө кечкисин 4 км жолду жөө басып барып ойнойм. Буйруса алдыда Кыргызстандын волейбол боюнча курама командасына кирүүгө аракет кылып жатам», - деди ал.

Бекзат мырза үй-бүлөдө 4 бир тууган.

Эгиздер: Таластык Бекжан менен Бекзат бөлүнүп кетишсе бири-бирине куса болуп, ооруган учурлар болгон (сүрөт)

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×