Бөлүмдөр
Бейшемби, 18-июль
Чүй облусу, Кара-Балта 19.06.2019 22:33

Кара-Балтада эне-бала бычакталды, – милиция

Иллюстрациялык сүрөт
Иллюстрациялык сүрөт

Turmush -  Кара-Балта шаарында денеси табылган эне-балага бычак менен кол салышкан. Бул тууралуу Чүй облустук ички иштер башкармалыгынан билдиришти.

Алардын маалыматына караганда, бүгүн, 19-июнь күнү болжол менен саат 17:45 чамасында Жайыл районунун ички иштер бөлүмүнүн нөөмөт бөлүмчөсүнө 30 жаштагы З.А. чалып, Кара-Балта шаарына жакын жайгашкан дачалардын биринде бет кап кийген белгисиз адамдар анын жолдошуна жана кайын энесине бычак менен кол салышканын билдирген.

Окуя болгон жерге Жайыл РИИБдин ыкчам тергөө тобу барып, болжол менен 50-55 жаштагы аял кишинин жана 25-30 жаштагы эркек кишинин денесин табышкан. Аларга сырттан кароо жүргүзгөндө киши колдуу болуп каза болушканы аныкталган. Кийинчерээк каза болгон жарандар Кара-Балта шаарынын тургундары - 53 жаштагы М.С. аттуу аял жана анын 31 жаштагы уулу М.А. экендиги белгилүү болгон.

Аталган окуя Кылмыштардын жана жоруктардын бирдиктүү реестрине Кыргыз Республикасынын Жазык кодексинин 130-беренеси (Киши өлтүрүү) боюнча катталып, сотко чейинки өндүрүш иштери башталган. Кылмыштын бетин ачуу үчүн Чүй ОИИБдин жана Жайыл РИИБдин тажрыйбалуу кызматкерлеринен ыкчам топ түзүлүп, тиешелүү иш-чаралар жүргүзүлүүдө жана экспертизалар дайындалды.

Turmush басылмасы бүгүн, 19-июнда Кара-Балта шаарынын жогору жагында дачалар жайгашкан аймакта 2 адамдын денеси табылганын жазган. Каза болгондор эне-бала болушкан.

Болжолдуу маалыматка караганда, маркум аял жумуштан келгенден кийин уулу менен бирге дачалар жайгашкан аймакка барган. Ал базарда акча алмаштыруучу жайда иштечү.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×