Бөлүмдөр
Бейшемби, 18-июль
Чүй облусуАламүдүн району 19.06.2019 09:15 На русском

«Жолдошум менен апам тааныштырган»: Кыргыз кызынын Италиядагы махабаты (сүрөт)

Turmush -  Бишкек шаарында чоңойгон 27 жаштагы Алтынай Жумашева Италияга барып бактысын тапты. Turmush басылмасы Алтынай айым менен баарлашты.

Италияга сапар

2016-жылы Кыргызстан эл аралык университетинен туризм багытында адистик алып чыккам. Окууну бүтөрүм менен Италияга апамдын жанына келдим. Ага чейин элчиликтен уруксат ала албай койгом. Апам 17 жылдан бери Италияда жашайт. Өзүмдөн 20 жаш кичүү сиңдим да бар. 3 жылдан бери Италиянын Казерта провинциясында жашап жатам. Италиялыктар абдан меймандос жана үнөмдүү жашаганды билген эл. Италиянын жаккан жери маянанын жакшы төлөнүшү.

Жолдошум менен апам тааныштырган

Жолдошум да 27 жашта. Бизди апабыз тааныштырган. Күйөөм кайын энеси менен чогуу ашпозчу болуп иштейт. Биз дос болуп жүргөн учурда мен пиццерияда иштечүмүн. Ал күндө мотоцикл менен келип, мени алып кетчү.

Бир күнү эмнегедир мага келбей калды. Жүрөгүм бир нерсени сезгендей болуп жатты. Түнкү саат 2:30 чамасында үйгө келип, тепкичтер менен көтөрүлүп бара жатып, кандын тамчылаганын көрүп калдым. Жогору көтөрүлсөм үйдүн эшиги ачык экен. Үйдүн ичинде кан көп агыптыр. Жатуучу бөлмөгө кирсем ал кан болуп, шок абалда туруптур. Мурдунан, жүзүнөн кан агып жатыптыр. Ал кимдир бирөөнү жардамга чакырууну айтып кулап түштү. Ошондо келип жардам берген 2 адамга рахмат. Көрсө ал ошол күнү кечинде иштен кийин досторуна барыптыр. Мотоцикл менен бара жатканда катуу ылдамдыктагы унаа койдуруп кетиптир. 2 колу, мурду сынып, чыканактары, тизелери сыйрылыптыр. 2 ай ооруканада жатты. Ошол учурда мен жанында болдум. Ал айыккан сайын бул тагдырымдагы адам экендигин түшүнүп жаттым. Күн өткөн сайын экөөбүз абдан жакын болуп бара жаттык.

Өткөн жылы ал менин колумду сурады. Экөөбүз 2 ай мурда баш коштук. Бирок үлпөт той өткөргөн жокпуз. Ал акчага саякатка баралы деп чечтик. Сүйүү улутка, бай же кедей экендигиңе карабайт. Тагдырга кандай жазылган болсо ошондой болушу керек. Азыр окуп, билим алууну пландап жатам. Анткени биздин дипломдор Италияда жарабайт. Кийин кесибим менен иштеп, туристтик фирма ачкым келет.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×