Бөлүмдөр
Шейшемби, 16-июль
Нарын облусу, Нарын 13.06.2019 11:04 На русском

Нарын башчысына алтын иштеткен кытайлык компанияга коюлган талаптар эскертилди

Turmush -  11-июнда өкмөттүн Нарын облусундагы ыйгарым укуктуу өкүлү Аманбай Кайыпов Нарын районунун Миң-Булак айыл өкмөтүнүн башчысы Казыбек Усуповду, жергиликтүү кеңештин депутаттарын жана «Теңир-Тоо — ыйык жерим» коомдук бирикмесинин өкүлдөрүн кабыл алды, деп билдирди аймактык кабарчы.

Аларды облус башчысынан тышкары биринчи орун басар Касен Асизов жана Нарын районунун акими Семетей Черикбаев тосуп алды. Миң-булактык жоон топ Солтон-Сарыда алтын кенин иштеткен кытайлык Jhong ji Mining company компаниясына айыл элинин койгон талаптары аткарылбай жана бир катар эрежелер сакталбай жатканын билдиришти.

Айылдык кеңештин депутаты Кенжегүл Бектемирова: «Айылдан барып иштеген жумушчуларга ортомчулар айлык акысын аз берип жатыптыр. Иштеп жаткан техникалар бузулуп калган учурда айлыктарынан кармап жатышыптыр. Ошол маселени айта албай жатабыз. Карап берип койсоңуздар», - деди.

Айылдык кеңештин төрагасы Камчыбек Таалайбек уулунун айтымында, алтын кенин иштеткен Кытай компаниясы менен болгон келишимдердин айрымдары аткарылбай келет.

«Буга чейин чечилбей келген маселелерибиз көп болгон. Биздин коомдук бирикме дагы бул жерге барып көрүшүп, кемчиликтерди аныктап келишкен. Бул боюнча актылар түзүлүп, тиешелүү жерге кайрылганбыз. Мисалы, айлана-чөйрөнү булгап, таштандыларды ар кайсы жерге төгө беришкен. Ошол жердеги суулар булганып, экологияга терс таасирин тийгизип жатат. Келишимде жумушчулардын 85 пайызы айыл тургундарынан болот дешкен. Бирок бул дагы аткарылбай, Кытай жарандары иш жүргүзүп жатат. Биздин жумушчулардын айлык акылары салыштырмалуу кыйла эле аз болуп жатат», - дейт ал.

Дубан башчы А.Кайыпов бул көйгөйлөрдү угуп, алардын койгон талаптары туура экендигин билдирип, айтылгандарды компаниянын жетекчилерине жеткирүүнү убада кылды.

«Мага талап койбогула, андан көрө силер менен биргелешип иштейли», - деди ал.

Жакын арада Солтон-Сарыдагы алтын иштеткен кытайлык компанияга коюлган талаптардын аткарылышы боюнча Аманбай Кайыпов баш болгон бир катар бийлик өкүлдөрү, укук коргоо органдары жана ЖМКнын өкүлдөрү аталган жерге барышат.

Буга чейин 4-июнда өкмөттүн Нарын облусундагы ыйгарым укуктуу өкүлү Аманбай Кайыпов тиешелүү кызматтын жетекчилери жана Миң-Булак айылынан түзүлгөн коомдук кеңештин өкүлдөрү болуп Солтон-Сарыдагы «Чжун Дьжи Майнин компани» («Jhong ji Mining company») компаниясынын ишмердүүлүгү менен таанышкан болчу.

Солтон-Сарыда кен казуу жана чалгындоо үчүн Мамлекеттик геология агенттигинен 2012-жылы лицензия алган «Jhong ji Mining company» компаниясынын жүргүзгөн алгачкы иликтөөсүнүн жыйынтыгы боюнча 1500 гектар жерде 10 тонна 52 кг алтын бар. Комбинаттын курулушу болсо 2018-жылга пландалган. Бирок жергиликтүү тургундар алтын кенин иштетүүгө каршы чыгып, түшүндүрүү иштеринин натыйжасында кен иштетүүчү комбинаттын курулушу жакын арада башталганы турат.

Компания жерди убактылуу пайдалануу үчүн 2030-жылга чейин мамлекеттен уруксат алган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×