Бөлүмдөр
Бейшемби, 18-июль
Нарын облусу, Нарын 17.06.2019 21:46

Айыл турмушу: Агайына турмушка чыккан М.Молдалиева памирлик кыргыздарга кийим тигип берди

Turmush -  Нарын шаарынын 44 жаштагы тургуну Мизера Молдалиева 6 жылдан бери кыргыздын улуттук кийимдерин тигип келет. Анын кол эмгектерин аймактык кабарчы көрүп келди.

Өзүнүн айтымында, Тажикстанда чоңоюп, мектепти ушул жерден бүткөн. Ал кичинекей кезинде чоң энесине жардам берип жүрүп, кийим тигүүнү үйрөнгөн.

«Менин атамдын кесиби бухгалтер. Ал Таласта иштегендиктен 1-класстан 4-класска чейин Талас шаарында окуп, кийин 5-6-классты Бишкек шаарындагы №47 мектепте окудум. Апам дарыгер болгондуктан аны башка аймактарга жана чет өлкөгө иштөөгө жиберип турчу. Ошол себептен Тажикстандагы Жерге-Тал районуна караштуу Жайылган айылындагы А.Дехоти атындагы №2 орто мектебинен билим алып, окуумду ийгиликтүү аяктадым. Ал жерде 70% кыргыз эли, 30% тажик эли жашачу. Алар менен кыргыз тилинде сүйлөшчүбүз.

Кичинекей кезимде дарыгер болууну кыялданчумун. Бирок ал балалык кыялымды ишке ашырган жокмун. Анткени чоң энем ишмер болгондуктан ага жардам берип жүрүп, кол өнөрчүлүккө кызыгып кеттим. Ошонун негизинде Бишкек шаарындагы Исхак Раззаков атындагы Кыргыз мамлекеттик техникалык университетине барып, 1998-жылы жеңил өнөр жай инженердик технология адистигин алып чыктым. 6 жылдан бери шаарыбыздагы Сатыбалды Нааматов атындагы Нарын мамлекеттик университетинде эмгектенип, студенттерге кийимди конструкциялоо жана моделдештирүү, технология сабактарынан билим берүү менен бирге буйрутма алып, кошумча киреше табам. Шакирттериме кыргыз улуттук кийимдерди бычууну, тигүүнү башынан аягына чейин үйрөтөм. Алар менен биргеликте облусубуздун атынан сынактарга катышып, биринчи жана экинчи орундарды багындырып келебиз. Мага эле эмес, окуучуларыма дагы буйрутмалар түшүп турат.

Өзүбүздүн улуттук кийимибизден сырткары, Тажикстанда окуп калгандыктан алардын улуттук кийимдерине кызыгып, тигип калам. Ошону менен бирге Улуу жана Кичи Памирден келген этникалык кыргыздардын дагы кийимине кызыгып, алардын кийимин тигүүнү үйрөндүм. Аларга белек кылып, кийим тигип бердим», - деди ал.

Кол өнөрчү жолдошу менен студент кезинде таанышкан.

«Жогорку окуу жайда акыркы курста окуп жаткан кезде унаа айдоону үйрөнүү үчүн атайын мектепке жазылгам. Ошондо унаа айдоону үйрөткөн агайымды жактырып калып, экөөбүз тил табышып, ага 22 жашымда турмушка чыккам. Ошондон азыркы күнгө чейин турмуштун ысык-суугун бирге татып, бири-бирибизге түшүнүү менен мамиле жасап келебиз. Биздин учурда 2 кыз, 2 уулубуз бар. Жолдошум Эгемберди Молдалиев дагы жогоруда аталган университетте эмгектенет», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×