Бөлүмдөр
Шейшемби, 16-июль
Ысык-Көл облусуЫсык-Көл району 07.06.2019 12:23

Кырчындагы 2,6 млн сомдук дааратканалар Ысык-Көлдүн жээгине орнотулуп жатат

Turmush -  Ысык-Көлдүн жээгине дааратканалар орнотулуп баштады. Бул тууралуу өкмөттүн Ысык-Көл облусундагы өкүлчүлүгүнөн билдиришти.

Маалыматка караганда, жайкы туристтик сезондун башталышы менен III Дүйнөлүк көчмөндөр оюндарында Кырчын жайлоосуна орнотулган дааратканалар облустун аймагына бөлүштүрүлдү.

«Ысык-Көл районуна туристтер көп келгендигине байланыштуу Өрнөк, Чок-Тал, Чоң-Сары-Ой, Тору-Айгыр айылдарына жана Чолпон-Ата шаарына дааратканалар орнотулду. Мындан тышкары, Балыкчы жана Каракол шаарларына, Тоң жана Түп райондоруна дагы бөлүштүрүлдү», - деп билдиришти облустук администрациядан.

Чоң-Сары-Ой айыл өкмөтүнүн башчысы Максатбек Сарбагышев билдиргендей, дааратканалар ушул эс алуу күндөрү пайдаланууга берилет.

«Туристтер көпчүлүк учурда Өрнөк жана Чок-Тал айылдарына токтошот. Азыр дааратканалардын жазуулары жаңыланып жатат, анткени кышкысын бир аз сүрүлүп калган экен. Алар муниципалдык менчикке карайт. Айыл башчы анын тазалыгына жооптуу болот», - деди ал.

Буга чейин Кырчын жайлоосунда 2,6 млн сомго дааратканалар орнотулганы маалымдалган. Анда бир даараткананын ичинде суу агызуучу септик, электр жарыгы да болору айтылган. Ошондой эле ден соолугунан мүмкүнчүлүгү чектелген жарандар үчүн ыңгайлуу дааратканалар бар.

Бул иш менен алектенүүчү курулуш компаниянын өкүлү Сарбагыш Эсенбаев дааратканадагы 1 эле септиктин баасы 95 миң сом экенин айткан.

«Бир дааратканада 5 унитаз, суу жана электр жарыгы болот. Коомчулукта дааратканалардын баасы кымбат деп талкууланып жатат. Бирок бул маалымат туура эмес. Ал эми дааратканага пайдаланылган контейнерлер Бишкектен алынып келди. Ошондой эле бул жерге орнотулган жабдыктар бүт борбордон ташылат. Эгерде коомчулук каражат туура эмес пайдаланылып жатат деп эсептесе, анда фискалдык органдар текшерүү жүргүзсүн. Бизде жашыра турган эч нерсе жок», - деп билдирген болчу С.Эсенбаев.

Буга чейин Кырчын жайлоосунда III Бүткүл дүйнөлүк көчмөндөр оюндарына даярдык көрүүнүн алкагында контейнер типтеги 8 даараткана орнотулганы, алардын жалпы сметалык баасы 2 млн 301 миң 744 сом болуп, ар бири 287,7 миң сомдон бааланганы маалым болгон.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×