Бөлүмдөр
Шейшемби, 10-декабрь
Ош облусу, Ош 20.05.2019 12:37 На русском

9 бала, 1 бөлмө үй, туугандардын балдарын да багуу: А.Камбарбекова коомдук унаага түшкөндө балдарын көргөндөр таң калышат. Сүрөт

Turmush -  Ош шаарынын 35 жаштагы тургуну Айгүл Камбарбекова үйүндө 9 баланы тарбиялап жатат. Аймактык кабарчы аны менен таанышты.

Анын айтымында, 18 жашында турмушка чыккан. Өзү 3 уул, 4 кыздын энеси. 2 ирет эгиз төрөгөн. Улуу кызы 15 жашта болсо, кичүү эгиздери 5 жашка чыкты. Андан сырткары өзүнүн бир тууган эжеси менен сиңдисинин 1 кыз, 1 уулун да чогуу карап, учурда тогуз баланы тарбиялоодо.

Бул үй-бүлө быйыл гана үй курушуп, өз үйүндө жашап башташты. Буга чейин ижарада жашаганына карабастан балдарды эч кимге таштабай багышкан. Азыр 7 бала мектепке, 2 бала бала бакчага барат.

«Мектепти бүткөндөн бери эле үйдө бала тарбиялап келем. Балдарымдын аралыгы 2-3 жаш. 2004-жылы улуу кызым, 2007-жылы уулум, 2009-жылы эгиз кыздар төрөлгөн. 2011-жылы дагы кыз төрөлүп, 2014-жылы эгиз уулдуу болгонбуз. Көрсө уруубуздан чоң энем 3 жолу эгиз төрөгөн экен.

Чоң кызым Акмаанай 5 жашка чыкканда эгиздер төрөлүп, кызым мага жардам берип, балалык күндөрүн ойноп өткөргөн жок. Эгиз кыздарым чоңоюшуп, эгиз инилерин карап жатышат. 4 балалуу болгон соң кантип багабыз деп жүргөндө бешинчи кызыбыз төрөлдү. Бир гана жолдошум иштегендиктен кыйналып жүргөндө эгиздер боюмда болуп калды. Бизден башка болсо мүмкүн боюнан алдырып салмак. Жолдошум «ырыскыны кудай берет, сен аман-эсен төрөй бер» дегендиктен төрөдүм. Эгиз кыздарды кычыраган кышта төрөгөм. Кээде сүткө, памперске акча жеткире албай, жаныбыздагы дүкөнгө карыз болуп калчубуз. Эгиздерге окшош кийим кийгизгим келгени менен акчабыз жетпегендиктен туугандардын балдарынын эски кийимдери менен чоңойткон күндөр болгон.

Ата-энем, кайын журтум «өзүңөрдүн үйүңөр жок болсо, кыйналасыңар» деп көп айтышчу. Өзүбүздүн үйгө кирген соң бардык кыйынчылык унутулду. 2017-жылга чейин 1 бөлмөлүү батирде ижарада жашап, катарыбыз менен жатып алчу элек. Азыр беш бөлмө турса да балдарыбыз түндө «сиздер менен жаталычы» деп келип алышат», - деди ал.

Өздөрү бир бөлмөдө жашап жатканына карабай, экинчи жолу турмушка чыккан эжеси менен сиңдисинин балдарын да алып калган. Алар да балдары менен алаксып, көнүп калышканын айтат.

«Балдардын ызы-чуусунан, түйшүгүнөн чарчаганда экөөнү энесине берели десем жолдошум «өзүңөр чыксаңар чыгып кеткиле, бул экөөнү өзүм багам» деп калат. Балдар бири-бирине өтө боорукер. Бири-бирисиз жүрө алышпайт. Кээде экөө же бирөө айылга кетсе бир нерсе жетишпей эле издешип калышат. Коомдук унаага түшсөк айдоочу «баары өзүңдүкүбү?» деп таң калат. Чоң кызым кичинесинен кыйналып төрөлгөндүктөн ыйлаак болуп, көп ооручу эле. Катар-катар төрөп, өзүм диплому жок дарыгер болуп калгам. Ооруканага кээде гана барабыз. Баарына тегиз тарбия жеткиргенге аракет кылам», - деди ал.

Айгүл айым «Баатыр эне» наамын 30 жашында алган. Учурда балдарынын улуусу намаз окуп, орозо кармашат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×