Бөлүмдөр
Бейшемби, 20-июнь
Жалал-Абад облусу, Кара-Көл 14.04.2019 09:40

Кара-Көл шаардык кеңешинин депутаттары шаардык бюджетти кабыл алышты

город Кара-Куль
город Кара-Куль

Turmush -  10-апрелде Кара-Көл шаарынын бюджети кабыл алынды. Бул тууралуу Turmush басылмасынын аймактык кабарчысы билдирди.

Маалыматка караганда, ал күнү шаардык кеңештин кезектеги сессиясы өтүп, ага 19 депутат катышты. Эң негизги маселе катары шаардык бюджетте 2018-жылдын жыйынтыгы менен үнөмдөлгөн каражаттарды каржылоо, шаардын быйылкы жылга бюджети жана 2020-2021-жылдарга болжолу жөнүндө маселе каралды. Шаар башчысы И.Еркеев, Финансы министрлигинин Кара-Көл шаарындагы башкармалыгынын башчысы Ж.Осмонкуловдун жана шаардык кеңештин бюджет, экономика жана финансы маселелери боюнча туруктуу комиссиясынын төрагасы А.Чаргыновдун баяндамалары окулду. Жыйынтыгында шаардын 2019-жылга бюджети жана 2020-2021-жылдарга болжолу 97 574,3 миң сомду туздү. Анын ичинде 7 миллион 480 миң сомдук атайын каражат бар. Шаардын өнүгүү бюджетине 17 330,8 миң сом каралды. Ал эми өткөн жылдын жыйынтыгы менен бош калган, үнөм каражат 7 107, 3 миң сомду түздү.

Сессияда ар түрдүү маселелер каралып, анын бири Кетмен-Төбө айылын таза суу менен камсыздоо көйгөйү болду. Анын чоо-жайын мэр И.Еркеев эл өкүлдөрүнө түшүндүрдү.

«Бул айыл ушул күнгө чейин таза суу менен камсыз боло элек. 2 жылдан берки иш-аракеттердин негизинде Кытай мамлекети тараптан бөлүнгөн гранттык негиздеги 29 млн сомдук долбоорду тартууга жетиштик. Бирок бул долбоордун ишке ашышы жаңы эле башталууда. Каржылоосу АРИС аркылуу болору айтылууда. Быйылкы жылы таза суу чыгаруга алгач долбоору даярдалып, экспертизасы жана башка иш аракеттери жүргүзүлүп, тендер өткөрүлсө, куруу иштери келерки жылга калат. 2015-жылы Кетмен-Төбө айылында суу чыгаруу үчүн ишканалардын бири суу түтүктөрүн тартып, бир азы калган. Кийин бул иш токтомдо көрсөтүлгөн желим суу түтүктөрү тартылбай, темирден тартылгандыктан жана дагы бир катар мыйзамсыз иштери боюнча укук коргоо органдарына өткөрүлгөн. Аталган иш боюнча прокуратурадан иликтөөлөр жүрүп, такталып, сунуш келди. Шаардык кеңештин тиешелүү комиссиясында каралып, сессияда алып чыгып отурабыз.

Кетмен-Төбө айылында таза суу чыгарууга түтүктөрдү тарткан ишкана калган 1,5 км суу түтүгүн, эки насосту орнотуу, дагы кошумча иштерин толук кандуу 10 күн ичинде бүткөрүп, суу чыгарууга даяр экенин билдиришти. Кытайдан келген долбоор ишке ашкыча, эл сууга муктаж болуп жатат. Азырынча чыгарып, элди суу менен камсыздап туралы деген максатта айтылып жаткан иш. Ал эми жаңы долбоор ишке ашса жаңы система менен толук кандуу курулары талашсыз», - деди шаар башчысы.

Ушул эле маселе боюнча эл өкүлү Амангелди Тайчабаров төмөнкүлөрдү кошумчалады.

«Кетмен-Төбөнүн суу маселеси өтө көйгөйлүү. 2015-жылдан бери келе жаткан иш. Буга чейин ишкана 6 км суу түтүгүн тартып, болжол менен 3 км сүү түтүгү тартылбай, иш токтоп турган. Мындан ары сиздер колдоп берсеңиздер, жасалуучу иштин мыйзамдуулугу толугу менен көзөмөлдөнөт», - деди ал.

«Кетмен-Төбө шаарчасына таза суу чыгаруу иши 2015-жылы башталган. Ошол кезде токтом шаардык кеңештин туруктуу комиссиясында каралбай, түз эле сессияга алынып чыгып, кабыл алынып калгандыктан биз ошол кездеги шаардык кеңештин депутаттары (мурунку чакырылыштагы депутаттар) токтомду жокко чыгарганбыз. Ал эми ишкана менен түзүлгөн келишимди сот мыйзамдуу жокко чыгарды», - деди төрага Б.Кыргызалиев.

Жыйынтыгында маселени депутаттар колдоп беришти.

Ошондой эле сессияда Канат көчөсүндөгү 22 гектардан ашык айдоо жерди муниципалдык менчикке өткөрүү маселеси каралды. Буга чейин ал жерди эл убактылуу ижарасын төлөп пайдаланып келишкен.

Кийинки маселе шаардык аксакалдар сотунун жаңы курамын бекитүү болду. Мурун аталган соттун 59 мүчөсү болсо, мыйзамдуу түрдө 9 мүчөгө кыскарып, жаңы курамды бекитип беришти.

Андан кийин Ак-Таш көчөсүндөгү таза суунун жоктугу, электр жарыгынын начардыгы боюнча айтылып, балдар ойноочу аянтча куруу маселеси да көтөрүлдү.

Шаардагы коммерциялык багыттагы түйүндөргө, дүкөндөргө, мекеме-ишканаларга, Бишкек—Ош жолунун кооптуу жерлерине видокөзөмөл орнотуу маселеси да каралды. Сессияда акыркы маселе болуп шаарга караштуу Оот айылына курулуучу цемент заводу каралды.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×