Бөлүмдөр
Бейшемби, 18-июль
Баткен облусу, Кызыл-Кыя 21.03.2019 12:11 Жаңыланды: 21.03.2019 14:11

Баткендиктер Нооруз майрамын салтанаттуу белгилеп, чет өлкөлөрдөн дагы коноктор келишти (видео)

Turmush -  Бүгүн, 21-мартта Баткен шаарында Нооруз майрамы салтанатуу белгиленип, ага чет өлкөдөн коноктор келди. Бул тууралуу Turmush басылмасынын аймактык кабарчысы маалымдады.

Маалыматка караганда, майрамга карата кечээ, 20-мартта сүмөлөк бышырылган. Салтанатка Өзбекстандын Сох районунун акиминин орун басары Абдышүкүр Турабаев баш болгон коноктор келди. Иш-чарада кыргыздын улуттук тамак-аштары даярдалып, жармаңке уюштурулду. Андан соң шаардагы борбордук стадиондо Баткен шаардык жана райондук маданият бөлүмү жана Бишкектен келген маданият өкүлдөрү тарабынан даярдалган концерттик программа тартууланды. Шаардын өнүгүшүнө салым кошкон инсандарга жана мыкты мугалимдерге ардак грамоталар ыйгарылды.

Нооруз майрамы Кызыл-Кыя шаарында салтанаттуу иш-чаралар менен башталды. Бул тууралуу Turmush басылмасынын аймактык кабарчысы маалымдады.

Шаардын маданият кызматкери Гүлайым Эргешованын айтымында, быйыл 40 кг буудай өндүрүлүп, 4 казанга 500 литр сүмөлөк бышырылды. Сүмөлөк жалпы шаар тургундарына таратылды. Шаар мэри Эрмекбай Топчубаев сүмөлөк бышыргандарга өз каражатынан акча берди. Мекеме-ишканалар арасында ыр кесе да уюштурулду.

Майрамдык иш-чаранын жүрүшүндө шаардын өнүгүүсүнө кошкон салымы үчүн бир катар мамлекеттик кызматкерлер мэриянын жана облус жетекчилигинин ардак грамоталары менен сыйланды.

Баткендин Сүлүктү шаарында дагы Нооруз майрамы салтанаттуу белгиленди. Маараке улуттук тамак-аш жана жергиликтүү чеберлердин килем көргөзмөсү менен башталды. Шаардын маданият бөлүмү тарабынан ыр-бийлер жана ар кандай театралдаштырылган чыгармалар аткарылды. Салтанатка Тажикстан Республикасынын Жаббар-Расулов районунун төрагасынын орун басары Тойчубой Атамуродзода баш болгон коноктор келди. Иш-чарада шаардын өнүгүшүнө салым кошкон адамдарга ардак грамоталар жана төш белгилер ыйгарылды.

Бүгүн, 21-мартта Баткен районунун Ак-Сай айылында дагы Нооруз майрамы салтанаттуу белгиленди. Бул тууралуу аймактык кабарчы маалымдады.

Маалыматка караганда, иш-чарага Баткен облусунун жетекчилиги катышты. Айыл эли майрамга карата концерттик программа, улуттук тамак-аштардын көргөзмөсүн даярдашып, айыл апалары бышырган сүмөлөктөн жалпы эл даам татышты.Жетекчилер чек арадагы элди майрамы менен куттуктап, элге тынчтык, биримдик каалап, ар кандай кырдаалдарга карабай чек арада чеп болуп жашап жаткан элге ыраазычылыктарын билдиришти. Ошондой эле өлкө борборунан эң алыста жайгашкан чек ара айылдарына мамлекет ар дайым өзгөчө көңүл бурарын белгилешти.

Бул күнү Ак-Сай айылында жаштардын аракети менен ачылган спорт залдын ачылышы да өттү. Облус жетекчиси Абиш Халмурзаев спорт залга керектүү спорттук жабдууларды сатып алуу үчүн 20 миң сом акчалай жардам көрсөттү. Аны менен катар Нооруз майрамынын урматына волейбол боюнча таймаш өткөрүп жаткан жаштарга байге катары 10 миң сом байге берди. Футбол боюнча мелдешип жаткан Үч-Дөбө айылынын жаштарына мелдеши 15 миң сом байге тапшырылды.
Ак-Сайдагы аталган спорт залдын имараты буга чейин пайдаланылбай бош жаткандыктан, айыл жаштары бейөкмөт уюмдарга долбоор жазып, анын негизинде имаратты оңдоп-түзөөдөн өткөрүшкөн.

Бүгүнкү майрамда Баткен облусунун жетекчиси Абиш Халмурзаев 13-14-март күндөрү Ак-Сай айылындагы кыргыз-тажик чатагынан жаракат алган адамдардан кабар алды. Октон жаракат алып, облустук ооруканада жаткан 3 жана таш тийген 1 адамдын абалы туруктуу экендиги белгилүү болду. Аларга атайын белектер тапшырылды. Дарыгерлер бейтаптардын барынын абалы канаатандыраарлык экендигин айтышып, дары-дармектер жетиштүү экенин билдиришти.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×