Бөлүмдөр
Дүйшөмбү, 25-март
Баткен облусуБаткен району 14.03.2019 18:15

Баткендеги ок атышуу: Вице-премьер-министр бул окуяларда чагымчыл күчтөр бар экенин айтып чыкты. Видео

Turmush -  Бүгүн, 14-мартта Баткен районунун Ак-Сай айылында абал менен таанышуу үчүн вице-премьер-министр Жеңиш Разаков келди. Бул тууралуу Turmush басылмасынын аймактык кабарчысы маалымдады.

Ал өз сөзүндө тажик тараптын вице-премьери менен сүйлөшкөнүн белгиледи.

«Негизинен бизде ушундай окуялар тез-тез эле катталып турат. Чындыгында көпчүлүк маселелер жазгы мезгилде күчөйт. Көп маселе делимитация маселелеринен көз каранды. Тажик тарап менен көптөн бери делимитация маселеси боюнча учурашуулар болгон эмес. Апрель айына карата иштерди түзүп жатабыз. Бул жерде жол салуу маселесинен чыр-чатак чыккан. Биз тийиштүү органдар менен иштейбиз. Тажик тараптан губернатор келген. Өзүм вице-премьери менен сүйлөштүм. Ал дагы келе жатат. Буйруса 2 мамлекеттин ортосунда комиссия түзүп, ар бир маселени талкуулап чыгабыз. Ошонун натыйжасында жыйынтык болот.

Жергиликтүү бийлик өкүлдөрү, күч органдары менен жыйын өткөрдүк. Албетте, бул жерде чагымчыл күчтөр бар. «Ошолорго алдырбагыла. Элдин тынчтыгын, кыргыз-тажик элдеринин ынтымагын бекемдегенге аракет жасагыла» деп жыйын өткөрдүк. Азыр эми жумуштарды жасайбыз», - деди ал.

Окуя тууралуу:

Бүгүн Баткен районунун Ак-Сай айылында кайрадан ок атылганы кабарланган.

Маалым болгондой, бүгүн Ак-Сай айылына вице-премьер-министр Жеңиш Разаков келген болчу. Ал күч түзүмдөрүнүн өкүлдөрү менен жолугушуп жаткан эле. Ошол учурда тажик тараптан ок атылып, кыргыз тараптагы милиция кызматкерине тийди. Аны тез жардам кызматы менен ооруканага алып кетишти. Жеңиш Разаков ызы-чуу боло түшкөн адамдарга жолугушууга барды.

Абалды чек арачылар, укук коргоо органдары, жергиликтүү бийликтин өкүлдөрү көзөмөлгө алууга аракет кылып жатышат.

Кечээ, 13-мартта саат 18:30 чамасында Баткен районунун Ак-Сай айылындагы чек арада кыргыз-тажик элинин ортосунда чатак чыккан.

Жергиликтүү тургундардын айтымында, Ак-Сай—Тамдык көз карандысыз жолун куруу үчүн техникалар бара жатканда тажик тараптан адамдар келип, таш менен урушкан. Ошондой эле тажик тарап чек арачылардын дагы кызматтык унаасынын айнегин таш менен сындырып салышкан. Жолго 2 техника барса, тажик тарап бирөөсүн иштетпей койгон. Жергиликтүү бийлик менен чек арачылар ошол техниканы жеткирип, кайра кайтканда тажик тарап таш менен уруп, унаанын айнегин сындырган. Андан кийин эки тараптан эл топтолуп, бири-бирине таш ыргытышкан. Чек арачылар абалды тынчтандыруу үчүн эскертүү катарында асманга ок да аткан болчу.

Курулуп жаткан жол

Андан кийин саат 20:00 чамасында Баткен районунун Ак-Сай айыл өкмөтүнүн Көк-Таш айылында да кыргыз-тажик жарандарынын ортосунда ок атышуулар болгон.

Күбөлөрдүн маалыматына караганда, Ак-Сай айылындагы кыргыз-тажик чырынан кийин Көк-Таш айылында да эл топтолгон. Тажик тарап да топтолуп, ок атышуулар болгон. Анын кесепетинен кыргыз тараптагы бир адамга ок тийип, тез жардам кызматы алып кеткен. Ага операция жасалып, абалы оор экендиги белгилүү болгон.

14-мартта Мамлекеттик чек ара кызматы Баткен облусундагы кыргыз-тажик чек арасындагы абал тынч экендигин билдирген.

Маалыматка караганда, саат 10:00го карата Таш-Тумшук айылында 1 үй, «Ауди» үлгүсүндөгү 1 унаа, жана кыргызстандык жарандын «КамАЗ» унаасынын чиркегичи күйгөндүгү такталды. Төрт-Көчө аймагында жолду тоскон тажикстандыктар өрт өчүрүүчү унааны кое бербей койгон.

Кечээ, 13-марттагы чатакта тажикстандык жарандар Баткен районунун Орто-Боз айылындагы тургундун сарайын өрттөп салышкан. Чек арадагы абалга байланыштуу чек арачылар күчөтүлгөн тартипте коомдук коопсуздук сактап жатышат. Баткенде азыр Мамлекеттик чек ара кызматынын жетекчисинин орун басары К.Исаков жүрөт. Бүгүн эртең менен Баткенге тажик тарап менен сүйлөшүү үчүн чек ара кызматынын полковниги Уларбек Шаршеев учуп кетти.

Учурда Кыргызстан менен Тажикстандын чек арачылары, облус жетекчилери, укук коргоо органдары Баткен—Лейлек (Кыргызстан) жана Исфара—Ворух (Тажикстан) унаа жолун ачтыруу боюнча сүйлөшүүлөрдү жүргүзүп жатышат.

Ал эми Тажикстандын УКМКнын Башкы чек ара башкармалыгы кыргыз-тажик чек арасындагы окуя боюнча өздөрүнүн версиясын жарыялаган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
Какой банк Вы считаете лучшим в Кыргызстане?
«Бакай Банк»
53.21% (778)
«РСК Банк»
28.39% (415)
«Капитал Банк»
6.36% (93)
...
Всего голосов: 1462
×