Бөлүмдөр
Шейшемби, 18-февраль
Талас облусуТалас 14.02.2020 11:40 На русском

Өзүмдүн аялыма ашык болдум: Таластын «атамандары» сүйүп жүргөн айымдар. Сүрөт

Turmush -  «Сүйүүдөн аалам жаралган, сүйүүнүн өзү түбөлүк» деп Чыңгыз Айтматов бекер айткан эмес. Ал ар бир үй-бүлөдөгү бакыттын булагы. Turmush басылмасынын аймактык кабарчысы 2019-жылы Талас облусундагы жогорку кызматтагы адамдардын жубайларына болгон сезимдерин сурап чыккан. Жаштар арасында популярдуу болуп жаткан сүйүү күнүнө карата аталган макаланы кайрадан жарыялайбыз.

Талас облусунун жетекчиси Марат Мураталиев:

Жубайым Бактыгүл Мураталиева 49 жашта. Өзү Чүй облусунун кызы. 24 жашымда үйлөндүм. Ал кезде мен Токмок шаарында иштеп жүргөм. Ошол жерден жубайым менен таанышып, жактырып үйлөндүк. Ал кезде үйлөнүү той, кортеж дегендер жок болчу. Кыргыздын салты менен эле нике кыйдырып, ата-энебиздин батасын алып үйлөндүк. Ошондон бери жашап келе жатабыз. Жубайымды сүйөм, 4 балалуу болдук.

Улуу балам азыр 27 жашта. Бишкекте Кыргыз-Орус Славян университетинин юридикалык факультетин бүтүргөн. Учурда бойдок. Экинчи кызым 1995-жылы төрөлдү. Бул кызым да юрист. Учурда Бишкекте кесиби боюнча иштеп жатат. 2 кичинекей кызым мектепте окуйт. Жумуштан үйгө барганда кыздарымды көрүп, чарчаганым басылып калат. Аялы жакшы болсо, эр жакшы дегендей жубайым мени дайыма колдоп келе жатат.

Талас шаарынын мэри Айдар Жузупбеков:

Келинчегим Жусубекова Чолпон Боо-Терек айылынын кызы болот. Учурда 43 жашта. Бизди апамдар тааныштырган. Ал убакта Чолпон 18 жашта, мен институтту жаңы бүтүп, 26 жашта болчумун. Мен окууну бүткөндөн кийин Бишкекте жүрүп алып, апамдар «Таласка, айылга кел. Шаардык, биз тааныбаган кыздар менен таанышпа. Өзүбүздүн таластык кыздарыбыз менен тааныш» деп тааныштырган. Андан кийин 2-3 айдай сүйлөшүп жүрдүк. Анан бири-бирибизди жактырып, үйлөнгөнбүз. Орустар «өзүмдүн аялыма ашык болдум» деп айтат го, анын сыңарындай жубайымды аябай катуу сүйөм (күлүп). 6-мартта үйлөнгөнүбүзгө 25 жыл болот. Улуу балабыз быйыл 24 жашка чыгат. Андан кийинки кызым 22ге чыкты. Андан кийинки улуум 14 жашта. Дагы бир кызыбыз 5 жашта, эң кичүү балабыз үчтө. Билинбей ортодон жылдар өтүп, үйлөнгөнүбүзгө 25 жыл болуп калды.

Талас шаарынын вице-мэри Дамирбек Курманалиев:

Жубайым Ольга корей улутунун кызы. Мен таежесине барып, «мен Ольгага үйлөнөм» деп айттым. Кийин ата-энеме телефон чалып, келе жаткан жумада келин алып барарымды жана ал корей кызы экендигин айткам. Алар дагы башында каршы болушкан. Мен аларга эң үлгүлүү үй-бүлө болорубузга сөз бергем. Себеби болочок жубайымды абдан жакшы көрчүмүн. Аны жоготуп алуудан абдан коркком. Ольганын ата-энеси дагы каршы болушкан. Кийин мени Таразга таанышууга чакырышты. Мен барганда «кантип жашайсыңар?» деген сыяктуу суроолор болгон. Кыргыз салты менен үйлөнөрүмдү жана ак жоолук салып алып кетеримди айткам.

Кийин кыргыздын салты боюнча ата-энем менен алдына түшүп барып, Ольганы алып келдик. Ал ислам динин кабыл алгандан кийин нике кыйылды. 18 жылдан бери жакшы жашап келебиз. Жубайым чынчыл, ашыкча сөздөргө кошулбайт, туугандарымды, ата-энемди сыйлап турат. Эң башкысы менин сүйүктүү жарым. 3 балалуу болдук. Улуу кызым Камила 2003-жылы, кийинки уулум Бекхан 2008-жылы жана кичүү уулум Эмирхан 2012-жылы төрөлдү.

Манас районунун акими Бектеналы Дүйшөбаев:

Жубайым Сүйүтбекова Динара учурда 53 жашта. Экөөбүз классташпыз. 9-класстан баштап сүйлөшүп жүрүп, 22 жашыбызда баш коштук. Жубайымды мындайча айтканда тырмактайынан сүйүп, бүгүнкү күнгө чейин ошондой эле көрөм. Экөөбүз ар качан бири-бирибизге жөлөкпүз. 4 уулду чоңойтуп, учурда 3 небере көрдүк.

Кара-Буура районунун акими Баратбек Сыдыкназаров:

Жубайым Эсенбекова Дамира 31 жашта. Талас районунун Таш-Арык айылынын кызы. Экөөбүз 2009-жылы таанышып, 2010-жылы 7-августта баш коштук. Үйлөнө электе ар кандай белектерди берип жүрдүк. Үйлөнгөндөн кийин дагы берип жатабыз. Азыркы күндө бактылуу үй-бүлөлөрдүн катарындабыз. Айылда турабыз. Үйдүн эң кичүү баласымын. Жубайым үйдүн сегизинчи келини болуп келди. 3 балабыз бар.

Бакай-Ата районунун акими Чолпон Төрөкулов:

Жубайым Төрөкулова Гүлина 58 жашта. Кара-Буурадагы Бейшеке айылынын кызы. Өзүмдүн апамдын сиңдиси болот. 1982-жылы менин туулган күнүмдө үйлөнгөнбүз. Ата-энебиз эле үйлөнтүп койгон. Үй-бүлөдө бири-бирине түшүнүү менен мамиле кылса сүйүү дагы, сый дагы болот. Жубайым бардык учурду түшүнүү менен кабыл алган адам. Экөөбүз 4 кыз, 1 уулду чоңойттук.

Талас районунун акими Замир Сыдыков:

Жубайым Лунара Кошалиева 36 жашта. Манас районунун, Кызыл-Жылдыз айылынан болот. Экөөбүз 2003-жылы келинчегимдин таежесинин туулган күнүнө барып калып, ошол жерден таанышканбыз. Сүйлөшүп жүрүп, 2004-жылы кыргыздын салты менен кайын журттан колдон алып кеткем. Ал кезде мен 24 жашта, келинчегим 19 жашта эле. Арадан билинбей 16 жыл өттү. Азыркы учурда 3 балалуубуз. Улуу кызым Гүлзаада 2006-жылы, уулум Барсбек 2008-жылы, Улукбек 2010-жылы төрөлгөн.

Талас облустук ички иштер бөлүмүнүн жетекчиси Алмазбек Жумабеков:

Жубайым Жумабекова Дамира учурда 42 жашта. 1993-жылы ал окуган окуу жайдын аялдамасында таанышканбыз. 1994-жылы баш коштук. Анда ал 19 жашта, мен 22 жашта болчумун. Жубайымды сыйлайм, сүйөм. Милиция кызматкеринин аялы болуш кыйын. Командировкалап 3-4 күн, кээде жумалап үйгө келбей калган учурлар болот. Үйдө жоктугумду билдирбей, балдарыбызды татыктуу тарбиялап келе жатат.

Талас облустук суу чарба башкармалыгынын жетекчиси Болот Батыркулов:

Жубайым Батыркулова Жайна экөөбүз 1988-жылы баш коштук. Жубайым Ысык-Көл облусунун Бостери айылынын кызы. Москвадан окууну аяктап келгенде таанышкам. Ал дагы студент болчу. Жактырып, сүйлөшүп жүрүп үйлөндүк. 4 кыз, 1 уулга ата-эне болдук.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×