Бөлүмдөр
Дүйшөмбү, 21-октябрь
Ысык-Көл облусуЖети-Өгүз району 25.12.2018 16:53 На русском

Айыл турмушу: Үйлөрдү жылуулаган Искендер Бабашов 4 айылдашын жумуш менен камсыздады (сүрөт)

Turmush -  Жети-Өгүз районундагы Барскоон айылынын 31 жаштагы тургуну Искендер Бабашов үйлөргө жылытуу системасын орнотуп, акча табат. Ал жашоосу, жумушу, кардарлары жана учурдагы жаштар тууралуу аймактык кабарчы менен болгон маегинде айтып берди.

Искендер Бабашов үй-бүлөдө 9 бир туугандын бешинчиси. Ал 2005-жылы Барскоон айылындагы орто мектепти аяктагандан кийин Каракол шаарындагы К.Тыныстанов атындагы Ысык-Көл мамлекеттик университетинин физика-техникалык факультетине тапшырган.

«Үй-бүлөлүк шартка байланыштуу Бишкек шаарына барып иштөөгө туура келди. Тигүү цехинде, курулуш тармагында иштеп, күнүмдүк каражат таап жүрдүм. 2008-жылы менден улуу агам Бекжандын жардамы менен Бишкектеги фирмалардын бирине ишке орноштум. Ал жерде меш жасаганды, жылытуу системасынын түрүн жасоону өздөштүрүп алдым. Эң башкысы ширетүүчү болуп эмгектендим. 2011-жылы ал фирмадан кетип, өз алдымча иш баштоону көздөп, даярданып, тиешелүү материалдарды алдым. Азыр кудайга шүгүр, маңдай терим, мээнетим менен каражат таап, үй-бүлөмдү багып жатам. Ишимди өзүм чоңойгон Барскоон айылымда улантып келем. Кардарларым көп, өзгөчө август, сентябрь жана ноябрь айларында тынымы жок иштеп калабыз. Эл көп деп жумушубузду чала жасабай, дыкаттык менен аткарабыз. Себеби эртеңки күнү элге уят болгум келбейт, кесипкөй катары өз жумушумду сыйлайм», - дейт ал.

Искендер 4 айылдашын жумуш орду менен камсыз кылган.

«Муздак үйгө жылуулук системасын орнотуп бергенде кардарың ыраазычылыгын билдирсе, андан көп ийгиликтерди жаратканга шашат экенсиң. Кудайга шүгүр, азырынча аткарган ишибизге нааразы болгондор жок. Барскоон айылы өтө чоң, элибиз көп, ага жараша курулуп жаткан үйлөр да арбын. Мурун айылдагы аттуу-баштуу кишилерге салам айтсаң алик албай, таанымаксан болуп басып кетишчү эле. Алардын үйлөрүндөгү жылытуу системасын жасап бергенден кийин азыр көчөдөн мени көрсө өздөрү келип салам беришет. Бул да болсо кесибимдин аркасынан тапкан ийгилигим деп билем. "Беш кол тең эмес" дегендей кээ бир үй ээлери жумушуңду аткаргандан кийин акчасын кемитип төлөөнүн айласын издеп, өйдө-төмөн сүйлөшөт. Мындай адамдар менен да иштешүүгө туура келет экен», - деди ал.

Искендердин айтымында, азыркы тапта көпчүлүк жаштар жумушсуздуктун айынан чет жакка жумуш издеп кетип жатканы өкүнүчтүү. Бул көйгөйдү чечүүгө Кыргызстандын ар бир жараны кызыктар болушу керек деп эсептейт. Ошондон улам келечекте өзү иштетип жаткан цехти кеңейтип, айылдаштарын иш менен камсыздоо тилеги бар.

Анын ата-энеси учурда пенсияда, алар 9 баланы тарбиялап, эрезеге жеткирген. Азыр ардактуу ата-эне балдарынын сый-урматын көрүп, айыл чарба менен алектенүүдө.

«Жубайымдын аты Наргиза, ал Тоң районунун Болот Мамбетов атындагы айылынан болот. Учурда 25 жашта. Наргиза менен ал чачтарач болуп иштеп жүргөн кезинде таанышканбыз. Экөөбүздү табыштырган, бизге ортомчу болгон досум болду. Наргиза ак көңүлдүүлүгү менен менин жүрөгүмдү багындырды. Үйлөнгөнүбүзгө аз гана убакыт болду, 2017-жылдын декабрь айында баш кошконбуз. Жубайым азыр үй жумуштары менен алектенет. Бирок үйдө отурса дагы мага чоң көмөкчү, моралдык жактан колдоп, ишимде ийгиликтерди жаратууга өбөлгө болуп келет. Азырынча наристелүү боло элекпиз, кудайым буйруса көп балалуу бололу деп тилек кылып жатабыз.

Албетте, ар бир кесип ардактуу. Эң негизгиси кесибиңди сүйүп, жакшы көрүп аткарсаң анын үзүрүн көрүүгө болот. Биздин мамлекетте жеке чакан ишиңди ачып, аны иштетүүгө шарттар бар. Жаштардын көбү чет жакка жакшы жумуш издеп кетип жатканы мени өкүндүрөт. Алар өз мекенинде калып иштегенине эмне жетсин. Ата-эне, бир тууган, досторуң жаныңда болот. Ошондуктан мекендештерибиз бири-бирине кайрымдуу болуп, жардамга колун сунуп турса, өзүбүздү өзүбүз көтөрүп кете алабыз», - дейт Искендер.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×