Бөлүмдөр
Бейшемби, 18-июль
Чүй облусу 19.06.2018 17:00 На русском

Москвада жүргүнчүлөрдү сүзүп кеткен Чыңгыз 16 жашында жүк ташып иштеп, мелдештерде бир нече медаль тагынган (фото)

Turmush -  Москва шаарында жөө жүргүнчүлөрдү сүзүп кеткен кыргызстандык таксист Чыңгыз Анарбек уулу 2017-жылы Россиянын Сочи шаарында өткөн панкратион боюнча дүйнөлүк чемпионатта (27-29-октябрь) 66 кг салмактагылар арасында коло медаль тагынган. Анын бир тууган агасы Алмазбек Анарбековдун айтымында, Чыңгыз 9-класстан кийин жүк ташуучу болуп иштеп, башынан көп кыйынчылык өткөрсө да спортту таштаган эмес.

«Ал жаштайынан эле чыйрак болуп өстү. Ошол бала кезинде эле сарайларга мүшөк асып, спорт менен машыкчу. Тойлордо, мааракелерде болгон күрөштөргө катышып жүрүп чоӊойгон. Айылдагы футбол, волейбол оюндарынан да калчу эмес. Тааныбаган киши менен тез эле тил табышып кете турган сапаты бар.

Чыңгыз Иринжит орто мектебин 7-класска чейин окуду. Андан соӊ Бишкекке үй-бүлөбүз менен чогуу көчүп келдик. Бишкектен Пригородный айыл өкмөтүнүн Озерное айылындагы мектептен 9-классты бүтүп, базарга жүк ташуучу болуп жумушка орношуп, спортко баш оту менен кирип, машыга баштаган. Алгач самбо менен машыгып жүрдү. Ага улай эле бокс менен машыгып, кийин бокска толук өтүп кетти. Бокс менен көптөгөн ийгиликтерге жетишип, спорттун чеберине талапкер болгон», - деди ал.

Чыңгыз 1990-жылы Жалал-Абад облусунун Аксы районуна караштуу Кош-Дөбө айыл аймагындагы Иринжит айылында төрөлгөн. 2013-жылы жубайы Аидага баш кошкон.

«Жубайы Аксы районуна караштуу Үч-Коргон айылынан болот. Экөөнүн 3 жаштагы Амина жана 1 жаштагы Ширин аттуу кыздары бар. Чыңгыз буга чейин да Россияга барып-келип иштеп жүрчү. Анда көбүнчө ашпозчу болуп иштеп, башкы ашпозчу болууга да жетишкен. Ал Ала-Тоо-3 конушуна үй салып жаткан. Ошол үйдүн курулушуна акча табуу үчүн Россияга кеткен. Үйдү толук бүтсөм биротоло келем деген. Андан кийин аялы "мен да барып иштеп жардам кылайын" деп, апабызга 1 жаштагы баланы таштап кеткен эле. Жубайы дагы ашпозчу болуп иштейт», - деди бир тууган агасы Алмаз.

Чыңгыз менен чогуу Россияга көп жолу барып иштеген туугандарынын бири Алтынбек Маликов: «Москвада иштеп жүрсө да, спортту таштабай ал жактан да машыкчу. Тула деген шаарга барып мелдешке катышып, 2-орунду, Челябинскке барып 3-орунду, Воскресенскке барып, ал жердеги мелдештен 2-орунду алган. Эртеӊ мененки саат 09:00дөн саат 10:00гө чейин иштеп, саат 10:00дөн саат 12:00гө чейин машыкчу. Ар күнү ушул көрүнүш кайталанчу. Кийин Москва облусундагы ресторандын жетекчилери Чыңгызды Питерге жөнөткөн. Питерге келгенде да машыгуусун таштаган жок. Бир жылдан кийин жетекчилери Москвага которушкан. Бул жактан да машыгуусун таштабай Сочиге барып, мелдештен 2-орунду алды. 4-5 айдан кийин да Сочиге барып, 1-орунду алып келген. Андан кийин Татарстанга мелдешке барды. Ал жактан 2-орунга илинди. Канчалык кыйналса да, спортту калтырып таштап койгон жок.

Адамга эч жамандыгы жок эле. Москвада чогуу жүрүп калдык. Мигранттарга жардам кылчу. Кыйналгандарга кош көӊүл карачу эмес», - деди ал.

Чыңгыз, үй-бүлөдө 5 бир туугандын экинчиси.

«Атасы Анарбек Маликов, апасы Зумураткан Манапбаева, улуу агасы мен Алмазбек Анарбеков, андан кийин Анарбек уулу Чыңгыз, Анарбек кызы Акмарал, Анарбек кызы Таӊсулуу жана инибиз Анарбек уулу Курбанбек», - деди агасы Алмазбек.

Москва шаарында жөө жүргүнчүлөрдү сүзүп кеткен кыргызстандык таксист Чыңгыз Анарбек уулу 16-августка чейин камакка алынды. Мындай чечимди 18-июнда Москванын Таган райондук соту кабыл алды.

Ч.Анарбек уулуна карата Россия Федерациясынын Кылмыш-жаза кодексиндеги 264-берененин 1-бөлүмү (жол эрежесин бузуу жана байкабастан транспорт каражаты менен адамдын саламаттыгына оор зыян келтирүү) менен кылмыш иш козголгон.

Соттун бул чечимин өзгөртүү сунушу бериле турганын Чыңгыздын жактоочусу Павел Березин жалпыга маалымдоо каражаттарына билдирген. Алар кыргызстандык таксисттин буга чейинки үлгүлүү жүрүм-турумун жана соттолбогонун белгилешти.

-------------------------------------------------------------------------

16-июнда кечке маал Москва шаарында футбол боюнча дүйнөлүк чемпионаттын күйөрмандары жайгашкан аймактагы жол кырсыктан 8 адам жабыркап, шектүү катары кыргызстандык айдоочу кармалган. Дарыгерлер жабырлануучулардын абалы канааттандырарлык экенин жана айрымдары үйүнө чыгарылганын билдиришти.

Чыңгыз Анарбек уулу

Москва шаарындагы жол кырсык

Айдоочу таксомотордук «Чекпоинт» фирмасында эмгектенип, окуя учурунда «Яндекс-такси» брендиндеги унааны башкарып бара жаткан. Текшерүүдө анын организминен алкоголдук ичимдик табылган эмес. Өзү көрсөтмөдө спирт ичимдигин ичпей турганын айткан.

Кыргызстандык таксист көрсөтмөсүндө ошол күнү 20 саат бою уктабай унаа башкарганын жана тормоздун ордуна газды басып алганын айтты. Ал жалпы жабырлануучулардан кечирим сураган. Өзүнүн айтымында, айдоочулук күбөлүктү 5 жыл мурун алып, 2 жылдан бери унаа башкарып жүргөн. Ал эми Россияда таксист катары эмгектенип жатканына 1 ай гана болгон.

Мекендештерден жардам

Чыңгыз Анарбек уулу кырсыкка кабылгандан кийин аны колдоп, жардам берүүгө үндөгөндөр көбөйдү. Учурда ал үчүн атайын ачылган эсепте каражат чогултулуп жатат.

Москвадагы кыргыз диаспорасынын «Кыргыз биримдиги коому» уюмунунун төрагасынын орун басары Улан Кошматовдун айтымында, спорт менен машыгып, ийгиликтерге жетишип жүргөн Чыңгыз буга чейин ашпозчу болуп иштеген. Акыркы айда таксист болуп эмгектенип жаткан.

«Чыңгызды колдоо максатында Москвадагы мекендештер акча каражат чогултуп жатабыз. Чыңгыз кыргыздын сыймыктуу уулу. Ал тынымсыз спорт менен машыгып келген. Бул кырсык. Таксиде иштеген адам көп убакыт уктабай жүрүп калат экен. Рулда уктап кетип, ушул кырсыкка кабылып отурат. Таксиде унаа үчүн 1500-2000 рублга чейин ижара төлөйт. Мындан сырткары бала-чакасын багуу үчүн дагы акча керек болот. Ошол себептен аз уктап, көбүрөөк иштеп жаткан экен», - деди У.Кошматов.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×