Бөлүмдөр
Шейшемби, 20-август
Жалал-Абад облусу 20.01.2018 12:18

Жалал-Абаддагы реабилитациялык борборго 2 баласын таштаган келин энелик укуктан ажыратылды. Дубайда экенин айткан энеге 6 ай убакыт берилет

Turmush -  Жалал-Абад шаарындагы балдарды убактылуу кармап туруучу мекемелердин бирине 3 жана 4 жаштагы балдарын таштаган бойдон дайынын билдирбей жаткан эне байланышка чыкты. Аймактык кабарчыга маалым болгондой, ал таанышына WhatsApp аркылуу байланышып, балдары тарбияланып жаткан борбордун телефон номурун сураган. Бул маалыматты балдарды карап жаткан мекеменин жетекчилиги да тастыктады.

Маалыматка караганда, изделип жаткан эне балдарын көрүүнү каалаганын жазып, Дубайда экенин билдирген. Бирок азырынча борбордун кызматкерлери менен байланыша элек. Жалал-Абад шаардык социалдык коргоо башкармалыгы кызматкерлер өздөрү да келин менен байланышууга аракет жасап, бирок мүмкүн болбой жатканын билдирди.

«Мекеменин кызматкерлерине байланышса энелик укугунан ажыратылганын билдирип, 6 ай аралыгында балдарын кайра кайтарып алууга мүмкүнчүлүгү бар экенин түшүндүрүүгө аракет жасайбыз», - деп маалымдашты мекемеден.

Балдарды коргоо бөлүмүнүн маалыматы боюнча, балдарын таштаган бойдон кабар албай жаткан энени Жалал-Абад шаардык соту энелик укугунан ажыратты. Бул чечим бир айдан кийин күчүнө кирет. Эми балдардын апасына 6 айга чейин аларды кайтарып алуу укугу берилет.

Маалым болгондой, бул аймакта былтыр балдарды коргоо бөлүмү тарабынан балдарды убактылуу кармап туруучу мекемелерге 19 бала жайгаштырылып, анын ичинен 18 бала кайрадан үй-бүлөсүнө, жакындарына кайтарылган.

Окуя тууралуу:

2014-жылы туулган кыз менен 2015-жылы туулган баланын апасы 2017-жылдын жай мезгилинде кыйынчылыкка кабылгандыгын айтып, балдарын убактылуу жайгаштырып турууну суранган. Жашы жыйырмадан ашкан келин Базар-Коргон районунун тургуну болгон. Ал борбор шаардагы кафелердин биринде официант болуп иштеп, убактылуу батирде жашачу. Балдары менен жашап жаткан батир кооптуу абалда болгон.

Кошуналарынын айтымында, балдар нан менен суу ичип жүрө беришчү.

«Келиндин жашоо шартын, балдардын абалын көргөндөн кийин келин бир аз бутуна туруп алсын деп балдарды убактылуу тарбиялап турууга макул болгонбуз. Эне балдарынан тынбай кабар алып турчу. Эки айдай балдарына келип жатты, андан кийин дайынсыз болуп кетти. Бишкекте экендигин айтып, бир жолу байланышкан бойдон дарегин таппай жатабыз. Аны алысыраак жакындары аркылуу да издедик. Милицияга кайрылдык, азырынча дареги тактала элек», - деп маалымдашты аталган бөлүмдөн.

Маалым болгондой, социалдык кызматкерлер балдардын атасын табууга да аракет кылышканы менен жыйынтык болгон эмес. Анткени келин жолдошу менен мыйзамдуу никеге турбай, балдардын күбөлүктөрү жалгыз бой эне катары алынган. Төрт айдан бери эненин дайынын таппай жаткан бөлүмдүн кызматкерлери сотко кайрылууга мажбур болушкан.

«Бир тууган балдар бул жерде 6 ай гана тарбияланып турганга болот, андан ашык убакытка мыйзам жол бербейт. Мөөнөтү өтүп бараткандыгына байланыштуу дайынсыз болуп жаткан келинди энелик укугунан ажыратуу боюнча сотко арыз берүүгө аргасыз болдук. Себеби келин жүргөн жерин айтпай, кабар да бербей жатат, балдарын сурап байланышка да чыга элек», - деп маалымдашты аталган бөлүмдөн.

Маалыматтарга караганда, келин өзү балдар үйүндө өсүп, кийин Сузак районуна келин болуп барган.

Азырынча бир туугандар балдарды убактылуу кармап туруучу борбордо каралып жатат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×