Бөлүмдөр
Шейшемби, 21-ноябрь
69.73    82.29    1.18    KZT 0.21
Ысык-Көл

«Жеңеке»: 20 жылдан бери жайлоодо жашаган М.Жумалиева койду өзү союп, устукандайт (фото)

Turmush -  «Жеңеке» долбоорунун кезектеги каарманы — Тоң районунун Тоң айылынын 41 жаштагы тургуну Жумалиева Мээрим. Учурда ал жолдошу Сагындык Алиев жана балдары менен Арчалы жайлоосунда жашашат.

«Мен Тоң районунун Тогуз-Булак айылында 1976-жылы төрөлгөм. Мектепти бүткөн соң Балыкчы шаарында эжемдин үйүндө жашап, иштеп жүрдүм. Кийинчерээк Тогуз-Булак айылындагы үйүмө келдим. Ошол убакта кошунабыз той өткөрүп жаткан экен. Апам мени ээрчитип, конокко алып барды. Тойдо конокко келген бир жигит мени көрүп, жактырып калган экен. Андан эки күн өткөндөн кийин жумушка кетүүгө камынып жолго чыктым. Жаныма жеңил унаа токтоп, айдоочусу ала кетүүнү сунуштады. Айылыбыз тоонун жанында болгондуктан автоунаа аз каттачу. Бейтааныш адамдын ала кетейин дегенине сүйүнүп, ойлонбостон отуруп алдым. Бирок ал унаа чоң жолго жеткенде Балыкчы шаарына бурулбай, Тоң району жакка бурулду. Ал жерде күтүп турган балдар да унаага отуруп, мен качып чыгууга жетишпей калдым. Мени келин алуучу үйгө алып барып, жоолук салууга аракет кылышты. Мен көпкө отурбай, ызы-чуу салдым. Бир маалда жаш кыз келип: «Сиз бизге жеңе эмес, апа болосуз» деп кучактап ыйлады. Жолдошумдун ата-энеси алар кичинекей кезинде эле каза болгон экен. Кайын сиңдимдин сөзү мага таасир берди, байкесин чакырып келди. Ал жакшынакай, оор басырыктуу жигит экенин көрдүм. Ошентип экөөбүз үй-бүлө куруп, бир туугандарына ата-энедей болуп, өзүбүз 2 уул, 4 кыздуу болдук. Быйыл үйлөнгөнүбүзгө 22 жыл болот», - дейт Мээрим Жумалиева.

Ал акыркы 20 жылдан бери Арчалы жайлоосунда мал багып жатышканын кошумчалады.

«Үй-бүлөбүз менен Арчалы жайлоосунда 20 жылдан бери жашайбыз. Өзүбүздүн жана элдин койлорун кошуп, жалпы 500дөй кой багабыз. Өзүм кичинекей кезимден бери мал багып чоңойгом, турмушка чыкканда кыйналган жокмун. Жайлоодо күн батареясын колдонобуз. Жолдошум жокто өзүм жалгыз кой союп, устукандайм, түрдүү тамактарды жасайм. Жолдошум ала качып келгенде отуруп калганыма эч качан өкүнбөйм, себеби өзүмдү бактылуу адаммын деп эсептейм», - деп кошумчалады М.Жумалиева.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Кароолор: 2721
Комментарии
Обсуждения закрыты
Көп окулду
Учурда окулуп жатат
×