Бакай-Ата районунун Миң-Булак айылынын 63 жаштагы тургуну Макулбек Качиев көп жылдардан бери саяпкерлик менен алектенет. Аймактык кабарчы саяпкерден кабар алды.
Өзүнүн айтымында, бул өнөр Талас өрөөнүнө көк бөрүчү катары белгилүү болгон Дооран атасынан өткөн. Бала кезинен тартып атасынын баккан жылкыларына көз салып, саяпкерликтин сырларын үйрөнө баштаган.
«Таптаган жорголорумдун ичинен Көк жорго Таласта эң күчтүү деп аталып, ат оюндарында бир нече байгелердин ээси болгон эле. Кийинчерээк аны «Мерседес-Бенц» жеңил унаасына алмаштырып жибердим. Азыр Көк жоргонун небереси Сары атты таптап жаткан мезгилим. Жоргону анын мүнөзүнө жараша таптоо керек. Атам экөөбүз ээрчишип, ат оюндарына көп барчу элек», - деди саяпкер.
Саяпкер мындан тышкары, тайган таптап, ууга чыгып эс алганды жактырат. Жубайы экөө 3 уул, 3 кызды тарбиялап өстүрүшкөн.
